काठमाडौं : नेपाल लोकतान्त्रिक वैदेशिक रोजगार व्यवसायी एशोसिएसनले वैदेशिक रोजगार सूचना व्यवस्थापन प्रणाली (फेमिस) र वैदेशिक रोजगारका अन्य क्षेत्रमा रहेका समस्या तत्काल समाधान गर्न वैदेशिक रोजगार विभागका महानिर्देशक दीपक काफ्लेको ध्यानाकर्षण गराएको छ ।
एशोसिएसनका अध्यक्ष नरेन्द्र प्रसाद ढकालको नेतृत्वमा आइतबार बिभाग गएको एशोसिएसनको प्रतिनिधि मण्डलले व्यवसायीले समाधान गर्नुपर्ने समस्याको बारेमा पटक– पटक विभागको ध्यानाकर्षण गराएपनि समाधान हुन नसकेको भन्दै महानिर्देशक काफ्लेको पुनः ध्यानाकर्षण गराएको मध्यान्हलाई जानकारी दिए ।
विभागका यसअघिका महानिर्देशक कृष्णप्रसाद दवाडीको कार्यकालमा पूर्व स्वीकृतिपछि पहिलोपटक विज्ञापन प्रकाशित भएको मितिले ३ महिनाको अवधिमा कामदार छनौट गरी छनौट सूची फेमिसमा अपलोड गर्ने सहमति भएको तर विभागले आफ्नो सूचना प्रणालीमा सातदिन भित्र कामदारको सूची अफलोड नभएमा पुनः विज्ञापन गर्नुपर्ने पुरानै सिष्टम कार्यान्वयन गरेकोले समस्या भएको कारणले महानिर्देशकको ध्यानाकर्षण गर्न बाध्य भएको अध्यक्ष ढकालले बताए ।
यसका अतिरिक्त धेरै अगाडिदेखि व्यवसायीलाई म्यानपावर कम्पनीको शाखा कार्यालय सञ्चालनको अनुमति दिने भनिएपनि हालसम्म त्यसको कार्यान्वयन नभएकोले समस्या परेको, जिट्को लाइसेन्स व्यवस्थित हुन नसकेको लगायतका विषय उठाई ध्यानाकर्षण गरिएको उनले बताए ।
विगतमा श्रम, रोजगार तथा सामाजिक सुरक्षा मन्त्रालयले मन्त्रालयको रोजगार समन्वय महाशाखा प्रमुख सहसचिव हरिप्रसाद मैनालीको संयोजकत्वमा व्यवसायी समेतको सहभागितामा गठित ९ सदस्यीय कार्यदल गठन गरेपनि समस्याको समाधान नहुँदै निष्क्रिय भएकोले त्यसलाई सक्रिय पार्नुपर्ने र त्यसका लागि विभागिय प्रमुखका हैसियतले विभागका महानिर्देशकले भुमिका खेलिदिन आग्रह समेत गरिएको ढकालले बताए ।
त्यस्तै व्यवसायीले राखेका मागका सम्बन्धमा छलफल गरी प्रतिवेदन दिन विभागले विभागका तत्कालिन सूचना अधिकारी तथा निर्देशक टिकामणि नेउपानेको संयोजकत्वमा सात सदस्यीय कार्यदल गठन गरेको र उक्त कार्यदलले फेमिसको प्रयोगमा रहेका जटिलता हटाइ सहजिकरण गर्ने सहमति जनाएको तर हालसम्म पुरानै प्रणाली रहेको कारणले व्यवसायीहरुले अनावश्यक खर्च र झन्झटिलो अवस्था झेल्नुपरेको विषयमा पनि ध्यानाकर्षण गरेकोे अध्यक्ष ढकालले जानकारी दिए ।
मन्त्रालयका तत्कालिन सचिव तोयम रायाको कार्यकालमा नै शाखा कार्यालय सञ्चलानका विषयमा कार्यविधि बनाई विभागले व्यवसायीहरुलाई सूचना गर्ने सहमति भएपनि सचिवको परिवर्तनपछि उक्त विषय ओझेलमा पारिएको, कोरोना भाइरस (कोभिड–१९) का कारण वैदेशिक रोजगारी गुमाई आएका कामदारका उजुरी सुनुवाई गर्ने, अनुगमनलाई यथार्थपरक बनाउने र जापानको रोजगारी र घरेलु कामदार पठाउन एउटै लाइसेन्स बनाउने जस्ता विषयलाई तत्काल समाधान गर्नुपर्ने व्यवसायीका मागमा विगतमा सहमति नजिक पुगेको तर कार्यान्वयनमा नआउँदा समस्या बढेको विषयमा पनि महानिर्देशक काफ्लेको ध्यानाकर्षण गरेको अध्यक्ष ढकालले जानकारी दिए ।
जवाफमा महानिर्देशक काफ्लेले आफू वैदेशिक रोजगार प्रशासनका समस्या समाधानका लागि गम्भीर रहेको भन्दै सकेसम्म छिटो समाधान दिन लागि पर्ने आश्वासन दिएका थिए । एशोसिएसन प्रतिनिधि मण्डलमा कार्यसमितिका पदाधिकारी तथा सदस्य एव सल्लाहकारहरूको सहभागिता रहेको थियोे ।
प्रतिक्रिया लेख्नुहोस्:-