काठमाडौं : सत्तरूढ नेकपा एमाले निकट प्रगतिशील वैदेशिक रोजगार व्यवसायी मञ्च नेपालले वैदेशिक रोजगार विभागले यस वर्ष सयजना कामदार वैदेशिक रोजगारमा पठाउन नसकेका म्यानपावर कम्पनीको पनि इजाजत नवीकरणको लागि निवेदन लिने बताएको छ ।
श्रम, रोजगार तथा सामाजिक सुरक्षा मन्त्रालयका सचिव तथा विभागका महानिर्देशकसँगको छलफलपछि हाल नवीकरण प्रयोजनका लागि सबै इजाजतवालाको निवेदन लिने सहमति भएको मञ्चका कार्यवाहक अध्यक्ष राजेन्द्र भण्डारीले मध्यान्हलाई बताएक छन् । विभागले केहीदिन अघि वैदेशिक रोजगार व्यवसायीलाई आवश्यक कागजात पेश गरी इजाजतपत्र नवीकरणको निवेदन दिन सूचित गरेको थियोे ।
नेपाल वैदेशिक रोजगार व्यवसायी संघसहित मञ्च, नेपाल लोकतान्त्रिक वैदेशिक रोजगार एसोसिएसन र वैदेशिक रोजगार व्यवसायी गणतान्त्रिक मञ्च लगायतले वैदेशिक रोजगार ऐन २०६४ तथा नियमावलीको प्रावधान अनुसार वर्षमा कम्तिमा एकसय कामदार वैदेशिक रोजगारीमा पठाएको प्रामाणित कागजातसहित नवीकरणका लागि निवेदन दिनुपर्ने व्यवस्था हटाउन माग गरिरहेका छन् ।
वैदेशिक रोजगार ऐन र नियमावलीको प्रावधान पूरा गरेर इजाजतपत्र नवीकरण गर्न निवदेन दिए असार मसान्तसम्म दश हजार र असोज मसान्तसम्म थप प्रति महिना १० हजारका दरले ३० हजार रुपैयाँ जरिवाना तिरेर इजाजत नवीकरण गर्न पाउने व्यवस्था छ ।
गत वर्ष लगातार दुई वर्षसम्म वार्षिक एक सय जना कामदार पठाउन नसकेका इजाजतपत्र प्राप्त संस्थाको इजाजतपत्र आर्थिक वर्ष २०७७/०७८ को लागि नवीकरण गराउँदा नवीकरण गरिदिई नवीकरण भएका इजाजतपत्र प्राप्त संस्थाको आर्थिक वर्ष २०७८/०७९ अर्थात यस वर्षको असार मसान्तमा नवीकरण गर्दा त्यस्ता संस्थाले आर्थिक वर्ष २०७६/०७७ देखि सम्बत् २०७८ सालको असार मसान्तसम्म कम्तीमा दुई सय जना कामदार पठाएको हुनुपर्ने शर्त राखी बाधा अड्काउ फुकाउने निर्णय गरेको थियो । तर यस पटक कस्तो निर्णय आउने हा सोमबारसम्म एकिन भइसकेको छैन । विभागले भने सयजना कामदार पठाएको प्रमाणसहित नवीकरणको निवेदन दिन सकिने बताएको छ ।
यस वर्ष पनि कोभिडको माहामारी फैलिएपछि हाल क्रियाशील ८ सय ५४ म्यानपावर कम्पनीमध्ये एक तिहाई भन्दा कम करिब सवा दुई सयले मात्र हालसम्म सयभन्दा बढी कामदार पठाएको आंकलन छ ।
संघ र राजनीतिक दलका प्रतिनिधिहरुसँगको भेटमा श्रम, रोजगार तथा सामाजिक सुरक्षा मन्त्री विमल प्रसाद श्रीवास्तवले सबै म्यानपावर कम्पनीको नवीकरण गरी समस्याको समाधानका लागि उच्चतम प्रयासमा रहेको बताएका छन् । तर विभागले नवीकरणको सुचना निकालेपछि सयजना कामदार पठाउन नपाएका व्यवसायी आत्तिएको अवस्था छ । मध्यान्ह दैनिक ले छापेको छ ।
प्रतिक्रिया लेख्नुहोस्:-