काठमाडौँ | भिजिट भिसामा युएईमा पुगेर तपाई काम गर्न चाहनुहुन्छ भने बिना श्रमस्वीकृति युएईमा काम गर्नु अवैध हो । युएईमा श्रम स्वीकृति नभई काममा लाग्नु युएईको श्रम कानूनको गम्भीर उल्लङ्घन भएको Dubai Public Prosecution ले जनाएको छ । Dubai Public Prosecution ले ट्वीटर मार्फत गत १२ जनवरीमा यस सम्बन्धि यस सम्बन्धमा ध्यानाकर्षण समेत गराउदै यस्तो लेखेको छ (तश्विरमा)
चेतावनी अनुसार युएईमा आवश्यक वर्क परमिट नलिई काम गरे कडा कारबाही भोग्नुपर्नेछ, जसमा तीन महिनाको जेल र १० हजार दिह्रामसम्मको जरिवाना समावेश हुन सक्छ । जारी ध्यानाकर्षणमा उल्लेख छ ‘भिजिट भिसा अन्तर्गत स्वदेश प्रवेश गर्ने र काम गर्न चाहने प्रत्येक विदेशीले सम्बन्धित निकायबाट अनिवार्य अनुमति लिनुपर्छ, अन्यथा तिनलाई तीन वर्षसम्म कैद सजाय वा दश हजार रुपैयाँभन्दा बढी जरिवाना वा यी दुईमध्ये कुनै एक जरिवाना हुनेछ । साथै अदालतले राज्यबाट निष्कासन गर्न आदेश दिनेछ ।’
युएई भिजिट भिसा नेपालीको लागि पनि टाउको दुखाई !
नेपालबाट विभिन्न प्रलोभन देखाउँदै वैदेशिक रोजगारीको नाममा ठगी गर्ने गिरोहले युएईमा भिजिट भिसामा पठाउने गरेका छन् । बिभिन्न प्रलोभनमा पारेर लैजाने तर त्यहाँ लगेपछि वेवास्ता गर्दा कयौं नेपालीहरु ओभरस्टे हुनुपर्ने तथा काम नपाएर स्वदेश फिर्ता हुनुपर्ने बाध्यता छ । भिजिट भिसामा जाने कयौं युवाहरुलाई चर्को अशुली गरेर लैजानेहरुको जालो काठमाडौँदेखि युएईसम्मनै फैलिएका छन् । केहि म्यानपावरले समेत भिजिट भिसाको धन्दा चलाउदै आएका छन् । वैदेशिक रोजगारीमा जान इच्छुक व्यक्तिबाट कुस्त कमाउन पल्केका दलाल र गिरोहले भिजिट भिसाबाट राम्रो र छिटो काम पाइने प्रलोभनमा पारी करोडौं रकम असुल गरिरहेका छन् ।
भिजिट भिसामा जाँदा विमानस्थलस्थित अध्यागमनका कर्मचारीलाई समेत धन्दावालाहरुले सेटिङमा राखेर काम गर्दै आएका छन् । भिजिटमा जानेहरुलाई त्यहाँका एजेन्टहरुले बिभिन्न धम्कि समेत दिएर काम नपाउदासम्म गुपचुप बस्न सल्लाह दिने गर्छन् । एजेन्टहरुले युएईमा एकै कोठामा दर्जनौं युवाहरुलाई राखेर काम खोज्ने गर्छन् । यस क्रममा कतिपयले काम समेत पाउदैनन्, पाएकाहरुले समेत प्रलोभन देखाए जति पाउदैनन् । भिजिटमा पुगेका कतिपय युवाहरुलाई एजेन्टहरुले उल्टै हप्की–दप्की र कुटपिट गर्ने गरेको समेत गुनाशो आउने गरेको छ ।
पीडितहरुको गुनाशो अनुसार भिजिटमा गएकाहरुको गुनाशोलाई युएईस्थित नेपाली दूतावासले समेत सुनेको नसुनेझैं गर्छ । कतिपय युवाहरु ओभरस्टे भई जरीवाना समेत तिर्न नसकी अर्को पटक युएई समेत आउन नपाउने गरि स्वदेश फर्किन बाध्य हुन्छन् । ठगिएर स्वदेश फर्किएकाहरुले नेपालमा न्याय पाउन पनि त्यति सहज छैन । ठगिएकाहरु मध्ये अधिकांसलाई दलालहरुले बिभिन्न बहानामा आफ्नो ट्रयापमा पार्ने गरेको कारण कागजी प्रमाण हुँदैन । प्रमाण भएकाहरुले समेत सजिलै न्याय पाउने अवस्था नरहेको पीडितहरुको गुनाशो छ ।
प्रतिक्रिया लेख्नुहोस्:-