सिड्नी । अष्ट्रेलियामा नेपालीहरको बसोबास बढ्दै गएसँगै यहाँको राजनीतिमा पनि नेपालीहरुको सहभागिता बढ्दै जान थालेको छ । अष्ट्रेलियाका मुख्य राजनीतिक दल लिवरल र लेवर पार्टीबाट मात्रै नभई स्वतन्त्र रुपमा समेत नेपालीहरुले उम्मेद्वारी घोषणा गरी चुनावी अभियान शुरू गरेका छन् ।
यसैवीच ४ डिसेम्बर २०२१ मा हुन गइरहेको स्थानीय चुनावमा एक दशकदेखि अष्ट्रेलियाको सिड्नीमा बसोबास गर्दै आएकी अस्मिता खरेल पौडेलले काउन्सिलर पदमा उम्मेद्वारी घोषणा गरेकी छन् ।
क्यामेलटाउन काउन्सिलमा काउन्सिलर पदमा लेवर पार्टीको तर्फबाट अस्मिता खरेल पौडेलले चुनाव लड्ने निश्चित भएको उनका पिता टुङ्गनाथ खरेलले जानकारी दिए । क्याम्पेलटाउन क्षेत्रमा नेपाली लगायत बहुसांस्कृति समुदायका बाक्लो बसोबास रहेकाले आफ्नो जीत करिब सुनिश्चित जस्तै रहेको खरेलको भनाई छ ।
४ बर्ष कार्यकाल रहने उक्त काउन्सिलमा लेवर पार्टीबाट लड्न लागेको भन्दै आफ्नाी छोरीको निम्ती सहयोग गर्न यहाँ रहेका नेपालीहरुलाई आग्रह गरे । एनआरएनए अष्ट्रेलियाको अघिल्लो पटकको चुनावमा सदस्य पदमा चुनाव लडेकी अस्मिता तथा उनको परिवार २००८ मा अष्ट्रेलियामा आएको थियो ।२०१० मा अष्ट्रेलिया आएकी अस्मिताले त्यसपछी उच्च शिक्षा शुरु गरेकी थिइन् ।
आफू आएपछि निरन्तर रुपमा एनआरएनएमा सक्रिय रहँदै आएका उनले हाल एनआरएनएको आजीवन सदस्यता लिएका छन् । उनीसहित उनका परिवारले लेवर पार्टीमा सदस्यता लिएको ६ बर्ष भयो । यस पटक हुन लागेको चुनावमा नेपालीहरुलाई पद दिने कुरा भएको थियो । सोही अनुसार लेवर पार्टीको नेता मसुद चौधरीले अस्मितालाई चुनावको टिकट दिने निश्चित गरेको उनले बताए ।
लेवर पार्टीले सामान्य काम तथा मजदुरी गरेर अघि बढ्न खोज्नेहरुको प्रतिनिधित्व गर्नेहरुको आवाज बोल्दै तथा उनीहरुको पक्षमा काम गर्दैै आएको कारण परिवार नै यस पार्टीमा सक्रिय रहेको उनीहरुको भनाइ छ । लेवर पार्टीका नेता मसुद चौधरीको नेतृत्वमा खरेलले उम्मेद्वारी दिएकी हुन् ।
४ डिसेम्बरको दिन न्यू साउथ वेल्स राज्यको १२८ वटा मध्ये १२४ स्थानीय निकायमा काउन्सिलरको लागि मतदान हुन गइरहेको छ । उक्त दिन आफ्नो उम्मेद्वारीमा साथ दिइ मतदान गर्न अस्मिताले रहाँ रहेका नेपाली मतदाता समक्ष आग्रह गरिन् । आफ्नो निर्वाचन क्षेत्रमा रहेका हरेक वस्ती वस्तीमा पुगी अस्मिताले आफ्ना चुनावी एजेन्डाहरु सार्वजनिक गर्दै मत मागिररहेकी छन् ।
यस क्षेत्रको राजनीति धेरै लामो समयदेखि देख्दै र जान्दै आएको भन्दै उनले अब नेपालीहरुका एजेन्डालाई पनि सरकारसामू उठाउने उद्देश्यले पनि उम्मेद्वारी घोषणा गरेको बताइन् ।
आफ्नो उम्मेद्वारीले अष्ट्रेलियाको राजनीतिमा नेपालीहरुको प्रभाव बढाउन समेत सहयोग पुग्ने उनको विश्वास छ । अस्मिताले हाल अष्ट्रेलियामा आफ्नो अध्ययन पूरा गरी अपाङ्गताको क्षेत्रमा काम गर्दे आएकी छन् ।त्यतिमात्र नभएर यहाँ नेपाली कला र संस्कृति जोगाउने उद्देश्यले आयोजित विभिन्न कार्यक्रमहरुमा उनको सक्रियता रहेको छ ।
उनको परिवार आफ्नो जन्मथलो नेपाल तथा बाग्लुङका विभिन्न आवश्यकताहरुमा सहयोग गर्दै आएको छ । यसअघि दोस्रो पुस्ताकै पिजे श्रेष्ठले लिवरल पार्टीबाट संघीय संसदको टिकट पाएका थिए ।
प्रतिक्रिया लेख्नुहोस्:-