काठमाडौँ — गत वर्षको पहिलो लकडाउनमा झैं यसपटक पनि अन्तर्राष्ट्रिय चार्टर उडानमा वायुसेवा कम्पनी र ट्राभल एजेन्टबाट यात्रु ठगिने क्रम नरोकिएपछि पर्यटन मन्त्री उमाशंकर अरगरियाले सोमबार नागरिक उड्डयन प्राधिकरणका महानिर्देशकको संयोजकत्वमा छानबिन समिति गठन गरेका छन् । संस्कृति, पर्यटन तथा नागरिक उड्डयन मन्त्रालयका प्रवक्ता तारानाथ अधिकारीका अनुसार मन्त्रीस्तरीय निर्णयबाट महानिर्देशकको संयोजकत्वमा ५ सदस्यीय छानबिन समिति गठन गरिएको हो । सहसचिव समेत रहेका अधिकारीका अनुसार, समितिमा प्राधिकरणका महानिर्देशक पोखरेलबाहेक त्रिभुवन अन्तर्राष्ट्रिय विमानस्थलका निर्देशक देवचन्द्र लाल कर्ण, मन्त्रालयका उपसचिव नरहरी घिमिरे, पर्यटन बोर्डका उपाध्यक्ष चन्द्र रिजाल र पर्यटन विभागबाट पर्यटक प्रहरी निरीक्षक सदस्य छन् ।
स्वदेशी तथा विदेशी वायुसेवा कम्पनीलाई अन्तर्राष्ट्रिय चार्टर उडान अनुमती दिने पर्यटन मन्त्रालयले चार्टर उडानको भाडामा विस्तृत छानबिन गर्न र आवश्यक कारबाहीका लागि प्रहरी लगायत सरकारी निकायमा कारबाहीका लागि सिफारिस पनि गर्न महानिर्देशक पोखरेलको समितिलाई अधिकार दिएको छ । सरकारले दोस्रो चरणको कोरोना संक्रमण रोकथाम गर्न लगाएको निषेधाज्ञापछि (वैशाख १९ यता) का अन्तर्राष्ट्रिय चार्टर उडान गर्दै आएका स्वदेशी विदेशी वायुसेवा कम्पनी र तीनका लागि टिकट बिक्री गर्ने ट्राभल एजेन्सीमाथि समितिले छानबिन गर्नुपर्ने भनिएको छ ।
निवर्तमान पर्यटन मन्त्री भानुभक्त ढकाललाई मौखिक जानकारी दिँदा पनि कारबाहीका लागि पहल नभएपछि जहाजको टिकट तथा टुर प्याकेज बिक्री गर्ने नेपाली ट्राभल एजेन्सीहरुको छाता संगठन ‘नेपाल एसोसिएसन अफ टुर एण्ड ट्राभल एजेट्स’(नाट्टा)ले जेठ २५ गते आफ्ना केही सदस्य ट्राभल एजेन्सीहरुले कतार र टर्किस एयरलायन्ससँग भइरहेका चार्टर उडानमा मिलोमतो गरी अनियमितता गरेकाले तत्काल कारबाही गर्न नयाँ पर्यटन मन्त्री अरगरियालाई मौखिक तथा नागरिक उड्डयन प्राधिकरणलाई लिखित पत्रै पठाएको थियो ।
प्राधिकरणका एक अधिकारीका अनुसार पछिल्लोपटक नेपालबाट चार्टर उडान गर्दै आएका विदेशी वायुसेवा कतार एयर र टर्किस एयरलायन्स तथा काठमाडौं हब भएको अन्तर्राष्ट्रय उडान गर्ने नेपाली वायुसेवा कम्पनी हिमालय एयरलायन्सका चार्टर उडानमा यात्रुले एकतर्फी हवाइ टिकटको मूल्य तेब्बरसम्म तिर्न बाध्य हुनु परेको उजुरी परेको छ । प्राधिकरणले आइतबार महानगरीय प्रहरी कार्यालय रानीपोखरीलाई जेठ ३१ गते हिमालय एयरलायन्सको काठमाडौं–दमाम उडानमा नेपाली कामदारबाट एकतर्फी हवाइ भाडा २ लाख बढी असुल भएको भन्दै छानबिन गर्न पत्राचार गरेको छ । त्यसैगरी चार्टर उडानमा संलग्न नेपाली ट्राभल एजेन्सीहरुमा दरबारमार्गमा रहेको प्रेसिडेन्ट ट्राभल र नागपोखरीमा रहेको मेगाबाइट ट्राभल एण्ड टुरबाट बिक्री हुने चार्टर उडानका टिकटमा अत्याधिक मूल्य असुल हुने गरेको यात्रुहरुले गुनासो प्राप्त भएको प्राधिकरणले जनाएको छ ।
यसअघि ०७७ जेठमा पनि चार्टर उडानमा एजेन्टहरुले वायुसेवा कम्पनीसँग मिलोमतोमा एकतर्फी हवाइ भाडा तेब्बरसम्म असुलेको गुनासो सार्वजनिक भएपछि तत्कालीन पर्यटन मन्त्री योगेश भट्टराईले सहसचिव सुरेश आचार्यको संयोजकत्वमा छानबिन समिति गठन गरेका थिए । तर, उक्त समितिले पर्यटन मन्त्रालयमा तीनवटा मन्त्री फेरिसक्दा पनि प्रतिवेदन नै सार्वजनिक गरेन । छानबिनको नेतृत्व गर्ने आचार्यको बढुवा–सरुवा भइसकेको छ । मन्त्रालयका अधिकारीहरुले उक्त प्रतिवेदनबारे कुनै जानकारी नभएको प्रतिक्रिया दिएका छन् ।
यसैबीच नाट्टाका एक पदाधिकारीले हालका समितिबाट पनि कुनै अपेक्षा नरहेको प्रतिक्रिया दिए । ‘सरकारले छानबिन समिति गठन नै गर्नुपर्दैन । अहिलेको लुटमा पनि पुरानै दुई विदेशी वायुसेवा र दुई नेपाली ट्राभाल एजेन्ट संलग्न छन,’ ती पदाधिकारीले भने, ‘हामीले सरकारलाई सूचना दिँदा पनि कारबाही नै हुँदैन ।’ कान्तिपुर दैनिकले छापेको छ ।
प्रतिक्रिया लेख्नुहोस्:-