काठमाडौं : नियन्त्रणका कडा प्रावधान र कारबाहीको चेतावनीसहित वैदेशिक रोजगार विभागले अभिमुखीकरण तालिम सञ्चालनको अनुमति दिएको छ । सरकारले वैदेशिक रोजगारीमा जान श्रम स्वीकृति दिन थालेपछि विभागले निजी क्षेत्रका संस्थाहरुलाई अभिमुखीकरण तालिम सञ्चालनको अनुमति दिएको हो । वैदेशिक रोजगार ऐन र नियमावली अनुसार वैदेशिक रोजगारको श्रम स्वीकृतिका लागि अभिमुखीकरण तालिम अनिवार्य गरिएको छ ।
विभागले सबै अभिमुखीकरण संस्थाहरुका नाममा सूचना जारी गर्दै विभागको वैदेशिक रोजगार सूचना व्यवस्थापन प्रणालीमा अभिमुखीकरण दिने संस्थाको सञ्चालकको मोबाइल नम्वर अनिवार्य अपलोड गर्न भन्दै मोबाइल नम्बर परिवर्तन गरेको भए नयाँ नम्बर अपलोड गर्न भनेको छ ।
त्यसैगरी विभागले तालिम कक्षा सञ्चालन भइरहेको जुनसुकै समयमा विभागबाट भिडियो कलमार्फत सम्पर्क गर्न सक्ने भन्दै सञ्चालकको ईमो, भाइबर र ह्वाट्स्एप नम्बर तथा आईडी नम्बर उपलब्ध गराउन, कार्यालय रहेको स्थान सहज पहिचान हुने गरी लोकेसन म्याप उपलब्ध पठाउन, तालिममा सहभागी प्रत्येक व्यक्तिको बायोमेट्रिक हाजिरी वैदेशिक रोजगार सूचना व्यवस्थापन प्रणालीमा सोही दिन अपलोड गर्न भनेको छ ।
त्यसैगरी विभागले प्रशिक्षकको नाम, शैक्षिक योग्यता र तालिम प्रमाणपत्रको नोटरी पब्लिकबाट प्रमाणित प्रतिलिपि पेश गरी विभागमा दर्ता रहेका प्रशिक्षकहरुबाट मात्र कक्षा सञ्चान गर्न पाउने उल्लेख गरेको छ । अभिमुखीकरण तालिम सञ्चालन कार्यविधि २०७६ ले तोेकेका सञ्चालकको योग्यता, संस्थाहरुको भौतिक पूर्वाधार र मापदण्ड पनि अनिवार्य पूरा गरेको हुनुपर्ने सूचनामा उल्लेख गरेको छ ।
तोकिएको सूचना वैदेशिक रोजगार सूचना व्यवस्थापन प्रणालीमा अपलोड नगरे वा विभागमा उपलब्ध नगराए संस्थाको कारोवार (युजर आईडी) बन्द गर्ने र विभागको अनुगमन कार्यविधि विपरीत देखिए प्रचलित कानून अनुसार कारवाही गर्ने विभागले जनाएको छ ।
यसअघि विभागले श्रम स्वीकृति दिन शुरु गरेपछि अभिमुखीकरण तालिम प्रदायक संस्थाहरुले तालिम दिन थाल्दा जथाभावी अभिमुखीकरण तालिम सञ्चालन गरिएको भन्दै हतार नगर्न आग्रह गरेको थियो । निषेधाज्ञाको समयमा पनि केही अभिमुखीकरण संस्थाहरुले सामाजिक दुरीसमेत कायम नगरी तालिम सञ्चालन गरिरहेको जानकारी आएको भन्दै विभागले अत्यावश्यक भएमा मात्र सामाजिक दुरी कायम गरेर अभिमुखीकरण तालिम कक्षा सञ्चालन गर्न सकिने भनेको थियो ।
प्रतिक्रिया लेख्नुहोस्:-