काठमाडौं : वैदेशिक रोजगारीको करार अवधि सकिएर घर फर्किन बाध्यतामा रहेका कामदारहरु नेपाल आइसकेपछि सरकारले तोकेका होटलमा बस्नुपर्ने शर्त गरी होटल बुकिङ नभए पनि स्वदेश फर्किन पाउने भएका छन् ।
संस्कृति, पर्यटन तथा नागरिक उड्डयन मन्त्रालयले जारी गरेको विदेशबाट नेपाल आउने यात्रुको व्यवस्थापनसम्बन्धी आदेश २०७८ मा विदेशको डिपोर्टेशन सेन्टरबाट आएका, जेलमुक्त भएका र बेखर्ची कामदारलाई दूतावासको सिफारिसको आधारमा क्वारेन्टिन, कोरोना परीक्षण र घरसम्म जाँदा लागेको खर्च नेपाल सरकारले दिने उल्लेख छ ।
विदेशबाट कोरोना भाइरसविरुद्धको दुबै डोज खोप लगाएका कामदार तथा अन्य यात्रुहरु सेल्फ क्वरेन्टिनमा बस्ने गरी सिधै घर जान पाउने भएका छन् । उनीहरु घर पुगेपछि कम्तीमा दश दिन भने सेल्फ क्वारेन्टिनमा बस्नुपर्ने छ ।
आदेशमा जहाजमार्फत आउने नेपालीले दुबै डोज खोप लगाएको प्रमाण र पीसीआर परीक्षणको रिपोर्ट नेगेटिभ भएमा सेल्फ क्वरेन्टिनमा बस्ने गरी सिधै घर जान दिइने छ । घरमा बसेको ११ औँ दिनमा कोरोना परीक्षण गर्नुपर्नेछ । उनीहरु घरमा सेल्फ क्वारेन्टिनमा बसे नबसेको जिल्ला कोभिड नियन्त्रण सेन्टर (डीसीसीएमसी) र पालिकाले कोभिड–१९ संकट व्यवस्थापन केन्द्र (सीसीएमसी)लाई प्रतिवेदन दिने छन् ।
आफ्नो रीतिरिवाज अनुसार अन्तिम संस्कारमा भाग लिन आउने नेपाली यात्रुको हकमा भने पालिका वा सीसीएमसीको सिफारिसमा एन्टिजेन परीक्षण गरी नेगेटिभ रिपोर्ट आएमा सिधै गन्तव्यमा जान दिइने व्यवस्था गरिएको छ ।-मध्यान्ह
प्रतिक्रिया लेख्नुहोस्:-