दोहा– कोरोना भाइरस (कोभिड-१९)को संक्रमणबाट ओमानमा कार्यरत ५ जना नेपालीको मृत्यु भएको छ ।
ओमानस्थित नेपाली दूतावासले दिएको जानकारी अनुसार कोभिड-१९ अहिलेसम्म ओमानमा कार्यरत ५ जना नेपालीहरूको मृत्यु भएको छ । केहीको विभिन्न अस्पतालमा उपचार भइरहेको नेपाली दूतावासले जनाएको छ ।
संक्रमण दिनानुदिन बढ्दै गईरहेकोमा नयाँ भेरियन्टहरूले यसको संक्रमण झन् तीव्र गतिमा फैलाईरहेकाले त्यहाँ कार्यरत नेपाली दाजुभाइ तथा दिदिबहिनीहरूलाई ओमानको सर्वोच्च समितिको निर्णयहरूको पूर्ण पालना गर्न दूतावासले अपिल गरेको छ ।
ओमानले कोरोनाको अनुगमन मुल्याङ्कन गरिरहेको त्यहाँको सर्वोच्च कमिटीको पछिल्लो निर्णयानुसार अर्को निर्णय नहुन्जेलसम्मका लागि रात्रिकालीन लकडाउन लागु गरिएको पनि दूतावासले जनाएको ।
त्यहाँको स्वास्थ्य मन्त्रालयले निकाल्ने दैनिक विवरणहरूलाई नियाल्दा ओमानमा कोभिड-१९ को संक्रमणदर व्यापकरूपमा बढ्दै गएको पाइएकाले संक्रमणको जोखिमबाट बच्न पर्याप्त मात्रामा सामाजिक दुरी कायम गर्न एवम् रोकथामका सम्पूर्ण उपायहरू अवलम्बन गर्न दूतावासले अनुरोध गरेको छ ।
दूतावासका अनुसार ओमानमा खोप लगाउने कार्यक्रम जारी रहेकोले त्यहाँ कार्यरत नेपालीहरूले आ-आफ्नो कम्पनी वा स्पोन्सरमार्फत खोप लगाउन समेत सबैमा अनुरोध गरेको छ ।
साथै, नेपाल लगायत विदेशबाट ओमान प्रवेश गर्ने यात्रुहरूले अनिवार्य संस्थागत रूपमा उक्त कमिटिले तोकेका होटलहरूमा ७ दिन क्वारेन्टिन बस्नुपर्ने नियम पनि यथावत राखिएको दूतावासले जनाएको छ ।
यसरी प्रवेश गर्ने यात्रुहरुले तारासुद प्लस एपमार्फत आफ्नो विवरण भरी अवतरण भएपश्चात् एअरपोर्ट मै पीसीआर परीक्षण गर्नु पर्ने व्यवस्था अनिवार्य गरिएको जनाएको छ ।-खबरहब
प्रतिक्रिया लेख्नुहोस्:-