काठमाडौं : कोरोना भाइरस संक्रमण विस्तारमा विदेशी कामदारहरु पनि जिम्मेवार रहेको आशंका मलेसिया प्रहरीले धरपकड तीव्र बनाएको छ । पछिल्लो समय नेपालीसहित विदेशी कामदारहरु बस्ने कम्पनीका होस्टेल, फ्ल्याट लगायतका स्थानमा अचानक छापा मारी भिसा आदी विषयमा जानकारी लिन थालेको मलेसियाका स्थानिय सञ्चारमाध्यमहरुले बताएका छन् ।
छापा मारिएका स्थान अवैधानिक विदेशी कामदारहरू भेटिएको भन्दै उनीहरुलाई पक्राउ गरिएको बताएको छ । पक्राउ पर्नेमा विदेशी कामदारहरुमा इण्डोनेशियाली बढी देखिएका छन् । हालसम्मको अवस्थामा नेपाली कामदार फाट्फुट रुपमा पक्राउ परेको समाचारमा उल्लेख छ ।
मलेसियाले अवैधरुपमा बसेका विदेशी कामदारहरुलाई जरिवाना तिराएर सम्बन्धित देशमा फिर्ता पठाउने गरेको छ । मलेसियाका सेलाङ्गर, क्वालालम्पुर लगायत क्षेत्रमा कडाईका साथ अवैधानिक कामदारहरुलाई धरपकड गर्न पनि शुरु गरिएको बताइएको छ ।
कोरोना संक्रमणलाई नियन्त्रण गर्न मलेसियाले लकडाउन जारी राखेर आवागमनमा कडाई गरिरहेको छ । हाल मलेसियामा दैनिक ६ हजार बढी संक्रमित देखिएका छन् । त्यो संख्या ४ हजार भन्दा तल नआएसम्म लकडाउन नखोल्ने सरकारले घोषणा गरेको छ । मलेसियामा दैनिक ८० जनाको हाराहारीमा मृत्यु संख्या देखिएको बताइएको छ । पछिल्ला दुई महिनामा देखिएको मृत्युदर डरलाग्दो भएको मलेसियाको स्वास्थ्य विभागका महानिर्देशकले बताएका छन् ।-मध्यान्ह
प्रतिक्रिया लेख्नुहोस्:-