नेपाल एयरलाइन्समा रणनीतिक साझेदार ल्याउन मोडालिटी प्रस्ताव

२१ असार, काठमाडौं । चालु आर्थिक वर्षको बजेटले घोषणागरे अनुसार नेपाल वायुसेवा निगममा रणनीतिक साझेदार भित्राउने सम्बन्धमा बहस शुरु गरिएको छ । नेपाल सरकारले निगमको नेतृत्वलाई निगमलाई कम्पनी मोडलमा चलाउने सम्बन्धमा आवश्यक प्रवन्धपत्र नियमावलीको ढाँचा माग गरेको थियो ।

सोही अनुसार निगम व्यवस्थापनले मन्त्रालयमा ढाँचा उपलब्ध गराएको छ । यससँगै अब निगममा रणनीतिक साझेदार भित्राउने सम्बन्धमा बहस शुरु भएको निगमका महाप्रवन्धक डीमप्रकाश पौडेलले बताए ।

‘हामीले प्रवन्धपत्रको प्रस्तावित ढाँचा मन्त्रालयमा बुझाएका छौं,’ उनले अनलाइनखबरसँग भने, ‘निकै लामो प्रक्रियाको बहस यहाँबाट शुरु भएको छ ।’

निगमको व्यवस्थापन सुधारका सम्बन्धमा करीव एक दर्जन भन्दा बढी समितिले अध्ययन गरि प्रतिवेदन दिइसकेका छन् । ती प्रतिवेदनको समेत अध्ययन गरी तत्कालीन पर्यटनमन्त्री योगेश भट्टराईले २०७६ साल असोजमा निगमका वर्तमान अध्यक्ष सुशील घिमिरेको अध्यक्षतामा सझुाव समिति गठन गरेका थिए ।

यो समितिमा निगमका वर्तमान महाप्रवन्धक समेत सदस्य थिए । यो समितिले दिएको सेयर संरचनासम्बन्धी सुझावका आधारमा प्रवन्धपत्रको नियमावलीको ढाँचा तयारी पारी सरकारलाई बुझाइएको महाप्रवन्धक पौडेलले जानकारी दिए । उनका अनुसार ढाँचामा निगममा रणनीतिक साझेदार भित्राउने र सो प्रयोजनका लागि सरकारको बहुमत सेयर रहने गरि सेयर बाँडफाँटको प्रस्ताव गरिएको छ ।

यसअघिको सुझाव समितिले दिएकै सुझावका आधारमा नियमावलीमा समेत प्रस्ताव गरिएको महाप्रवन्धक पौडेलले बताए । यसअघि सुझाव समितिले नेपाल सरकार (कर्मचारी संचयकोष, नागरिक लगानी कोष, सामाजिक सुरक्षा कोष, नेपाल टेलिकम, बीमा समूह र अन्य इच्छुक र सक्षम सार्वजनिक संस्था)को ५१ प्रतिशत सेयर हिस्सा रहने गरि लगानी संरचनाको प्रस्ताव गरिएको थियो ।

कम्पनीको अधिकृत पुँजी २ सय अर्ब पुर्‍याउने र त्यसमा विदेशी साझेदार वा नेपाली लगानीकर्ता, नेपाल एयरलाइन्सका वर्तमान तथा भुपूकर्मचारी, निजामती कर्मचारी, पर्यटन व्यवसायी र संघसंस्था तथा सर्वसाधारण लगानीकर्तासम्मलाई लगानी गर्न सक्ने गरी लगानी संरचनाको सुझाव समितिले दिएको थियो । यसै समितिको सुझावलाई समेटेर निगमले प्रवन्धपत्र नियमावलीको ढाँचा बनाई मन्त्रालयका प्रस्ताव गरिएको महाप्रवन्धक पौडेलले जानकारी दिए ।

आगामी बजेटले के भनेको छ ?

आगामी आर्थिक वर्ष २०७८/७९ को बजेटले नेपाल वायुसेवा निगमको पुनसर्ंरचना गरि व्यवसायिक एवमः प्रतिस्पर्धी बनाउने उल्लेख गरेको छ । त्यसका लागि खुला प्रतिस्पर्धाको माध्यमबाट रणनीतिक साझेदार भित्राउने प्रक्रिया शुरु गरिने छ । निगमको सेयर पूँजि संरचना परिवर्तन गरि वृद्धि गरिनेछ ।

अब के हुन्छ ? 

महाप्रवन्धक पौडेलका अनुसार सरकारले माग गरे अनुसारको प्रस्तावमा नियमावलीको ढाँचा पठाएसँगै अब सरकारले यस प्रस्तावबारे व्यापक छलफल गराउँछ । रणनीतिक साझेदारी ल्याउन सक्ने अनेक मोडालिटीमा छलफल भई ठोस प्रस्ताव बन्छ ।

उनी भन्छन्, ‘नेपाल सरकारको निर्णय नै निगमका लागि सर्वमान्य हुन्छन् ।’ तर, अहिले भने अहिले निगमलाई कम्पनी मोडलमा लैजाने वा निगमको निजीकरण गर्ने गरी कुनै निर्णय भने नभएको स्पष्ट पारे ।

कर्मचारी भने आन्दोलिन

निगमले रणनीतिक साझेदारी सम्बन्धी प्रस्ताव मन्त्रालयमा बुझाएपछि निगमका कर्मचारी भने आन्दोलित बनेका छन् । उनीहरुले निगमलाई कम्पनी मोडलमा लैजान नहुने र निगमलाई सार्वजनिक संस्थान कै रुपमा अस्तित्व कायम राख्नु पर्ने माग गरेका छन् । सोही अनुसार गत शुक्रबारदेखि निगमको महाप्रवन्धक र निर्देशकहरुको कार्यकक्षमा कर्मचारीले तालाबन्दी गरेका छन् ।

निगमकी प्रवक्ता करिष्मा श्रेष्ठले निगमलाई सार्वजनिक संस्थानकै अस्तित्वमा कायम राख्नु पर्ने कर्मचारीको माग रहेको जानकारी दिइन् ।

उनले भनिन्, ‘सार्वजनिक संस्थानका रुपमा निगमको अस्तित्व मेट्न पाइदैन, निगम बचाउनु पर्छ र यसको संरचना पुनसंरचना गर्ने क्रममा अनेक विकल्पमा छलफल गर्नुपर्ने कर्मचारीको माग छ ।’ सोही अनुसार संवादको वातावरण समेत बन्दै गएको उनले जानकारी दिइन् ।-अनलाईन खबर