काठमाडौं : राधजानीको रातोपुलमा रहेको चन्द्रकामना म्यानपावर प्रा.लि.मा चोरी भएको छ । उक्त म्यानपावर कम्पनीका सञ्चालक सुरज कुमार मिश्रका अनुसार सोमबार अज्ञात समुहले कार्यालय फोडी दुई सेट डेस्कटप कम्प्युटर, एचपीको एक थान ल्यापटप, चेकबुक, कम्पनीका विभिन्न कागजपत्र, एक सेट सिसि क्यामरा लगेको छ भने दुई थान सीसी क्यामराको मनिटर र फर्निचर तोडफोड गरिएको छ । कार्यलयबाट केही थान पासपोर्टसमेत चोरी भएको संचालक मिश्रले मध्यान्हलाई बताए ।
सोमबार साँझ कार्यालय बन्द गरेर गएको र मंगलबार विहान कार्यालय खोल्न आउँदा चोरी भएको पाइएको सञ्चालक मिश्रले बताए । म्यानपवार कम्पनीको जानकारी पछि नेपाल प्रहरीको माली गाँउ चौकी तथा अपराध महाशाखाले घटनाको मुचुल्का गरेका छन् ।
म्यानपावर कम्पनीले कार्यालयका छाप तथा कागजात चोरी भएकाले छाप तथा लेटरप्याडको अनुचित प्रयोग हुनसक्ने भन्दै त्यस विषयमा वैदेशिक रोजगार विभागलाई समेत घटना सम्बन्धी जानकारी दिएको छ । घटनास्थलमा वैदेशिक रोजगार विभागका महानिर्देशक कृष्ण प्रसाद दवाडीसहितको टोली पनि पुगेको थियो ।-मध्यान्ह
प्रतिक्रिया लेख्नुहोस्:-