काठमाडौं : वैदेशिक रोजगार विभागले वैदेशिक रोजगार व्यवसायीहरुको इजाजतपत्र ३ वर्षका लागि नवीकरण गर्ने भएको छ । अघिल्ला दुई वर्षसम्म वार्षिक सयजना कामदार पठाउन नपाएका म्यानपावर कम्पनीको इजाजतपत्र नवीकरण गरिदिने मन्त्रिपरिषद्को असार १४ गतेको निर्णयपछि इजाजतपत्र तीन वर्षका लागि वा आगामी एक आर्थिक वर्षका लागि मात्रै नवीकरण गर्ने भन्ने विषयमा विभाग र व्यवसायीबीच फरक–फरक दृष्टिकोण देखिएको थियो ।
सत्तारुढ नेकपा एमाले निकट प्रगतिशील वैदेशिक रोजगार व्यवसायी मञ्च नेपालका महासचिव डिक बहादुर खत्री (कुमार)ले पटक–पटकको छलफलपछि विभागले रित पुगी आएका आवेदनको व्यहोरा वा आवश्यक कागजात हेरेर इजाजतपत्र प्राप्त संस्थाको इजाजतपत्र ३ वर्षका लागी नवीकरण गरिदिने भएको मध्यान्हलाई बताए । उनले त्यसको यथोचित फाइदा उठाउन व्यवसायीहरुलाई आग्रह समेत गरेका छन् ।
वैदेशिक रोजगार ऐनको दफा १२ बमोजिम व्यवसायीले चाहेमा एकै चोटी तीस हजार रुपैयाँ नवीकरण दस्तुर बुझाएर तीन वर्षका लागि इजाजतपत्र नवीकरण गर्न सक्ने प्रावधान छ । तर मन्त्रिपरिषद्को निर्णयपछि विभागले सकेसम्म एक वर्षका लागि मात्र इजाजत नवीकरण गरिदिने सोच बनाएको बताइएको थियो । तर शुक्रबारपछि विभाग व्यवसायीहरुको माग अनुसार इजाजत नवीकरण गर्न तयार भएकोले स्थिति सहज भएको खत्रीले बताए ।
विभागका महानिर्देशक कृष्ण प्रसाद दवाडीले पनि ऐन र नियमावलीको प्रावधान पूरा गरेर आउनेहरुको इजाजत नवीकरण गर्दा तीन वर्ष अवधिका लागि नै नवीकरण गरिदिने मध्यान्हलाई जानकारी दिए ।
वैदेशिक रोजगार नियमावलीको नियम ७ मा बैंक ग्यारेण्टीको अवधि कम्तीमा पाँच वर्षको हुनुपर्ने र उक्त बैंक ग्यारेन्टीको अवधि समाप्त हुनु भन्दा एक वर्ष अगावै पुनः अर्को अवधिको लागि त्यस्तो बैंक ग्यारेन्टीको अवधि नवीकरण गराई विभागसमक्ष पेश गर्नुपर्ने व्यवस्था छ । त्यस विषयमा विभाग र व्यवसायीको फरक फरक बुझाइरहेको थियो । महानिर्देशक दवाडीले नवीकरण गर्दा बैंक ग्यारेन्टी पुरै अवधिको हुनुपर्ने बताए ।-मध्यान्ह
प्रतिक्रिया लेख्नुहोस्:-