दोहा, कतार : कोरोना भाइरसविरुद्धको खोप उपलब्ध भएका मुलुकहरुमा अर्थतन्त्र चलायमान भएपछि विदेशी कामदार उच्च प्राथमिकतामा देखिएका छन् । विश्व स्वास्थ्य संगठनले कोरोना भाइरसविरुद्धको खोप स्वीकृत गरेपछि नेपाली कामदाहरुका प्रमुख गन्तव्य खाडीका विभिन्न मुलुकको अर्थतन्त्र चलायमान भई रोजगारी सिर्जनामा तिव्रता आएको बताइएको छ ।
खोपलाई प्राथमिकतामा राखेका कतार, साउदी अरब, बहराइन र ओमानले क्वरेन्टिनमा बस्ने विदेशी कामदार लिइरहेका छन् भने नेपालमा कोरोना संक्रमण बढेपछि यूएई, मलेसिया, कुवेतले नेपालबाट कामदार लैजान तत्कालका लागि रोक लगाएका छन् ।
यूएईले आफूले मान्यता दिइएको खोप लगाएकालाई मात्र प्रवेश अनुमति दिने भनेको छ । यूएईले नेपाललाई प्रतिबन्ध नै लगाएको छ । फाइजर, बायोएनटेक, मोर्डना, जोन्सन एण्ड जोन्सन र अक्ट्राजेनेका गरी पाँच कम्पनीका खोपलाई अनुमति दिएको कुवेतले अनुमति दिएको खोपको दुवै डोज लगाएका विदेशीलाई आगामी अगस्ट पहिलो तारेखदेखि प्रवेश दिने बताएको छ । ओमान र बहराइनले नयाँ भिसा जारी गरेका छैनन् ।
कतारले घर विदामा गएका नेपाली कामदारलाई सहज होस् भन्ने उद्देश्यले आगामी ६ महिनाभित्र कतार फर्किन पाउने नियम लागू गरेको छ । कोरोना भाइरस (कोभिड–१९)का कारण अन्तर्राष्ट्रिय उडान नभएको र कतारले नै प्रवेश रोकेका कारण स्वदेशमै रहेका धेरै नेपाली कामदारहरुलाई कतारको पछिल्लो नियमले राहत दिने अपेक्षा गरिएको छ ।
कतारको आवसीय भिसा र वर्क पर्मिट भिसा रहेकाहरुले ६ महिनाभित्र कतार आउँदा ‘इन्ट्री परमिट’ नचाहिने प्रावधान सार्वजनिक गरेको छ । सोमबारबाट यो नियम लागू हुने बताइएको छ । त्यस्तै विशेष कारण देखाउन सके ६ महिना कतार बाहिर रहेकाहरुले आवासीय अनुमतिपत्रको म्याद समाप्त भएपनि प्रक्रिया पूरा गरेर कतार आउन पाउने छन् ।
कतारले खोप नलगाएका विदेशी कामदारहरुलाई पनि प्रवेश अनुमति दिएको छ । तर कतार आएपछि १० दिन अनिवार्य क्वरेन्टिनमा बस्नुपर्छ ।
कतारको जनस्वास्थ्य मन्त्रालयले बालबालिकाको क्वारेन्टिन सम्बन्धमा केही सहजीकरण गर्दै नयाँ मापदण्ड जारी गरेको छ । जस अनुसार एक वर्षदेखि ११ वर्षसम्मका बालबालिकाले कुनै पनि क्वारेन्टिन बस्नुपर्ने छैन भने बाबुआमा दुवैले कोभिड विरुद्धको खोपको दुवै डोज लगाइसकेको हुनुपर्ने अनिवार्य गरिएको छ ।
हाल रेड जोनको सूचीमा राखेका नेपाल, भारत, पाकिस्तान, बंगलादेशबाट भ्याक्सिन लगाएका अभिभावकसँग जाँदा १२ वर्षदेखि १७ वर्षसम्मका भ्याक्सिन लगाएकाहरुले कतार प्रवेश पाउने छन् । कोभिडविरुद्धको भ्याक्सिन नलगाएका भए उनीहरु १० दिन होम क्वारेन्टिन बस्नु पर्नेछ ।
यसैगरी यदि कोभिड विरुद्धको खोप नलगाई ग्रीन जोनबाट कतार प्रवेश गरे ५ दिन होम क्वारेन्टिन अनिवार्य गरिएको छ । खोप नलगाई एल्लो जोन सूचीका देशहरूबाट कतार आउनेलाई ७ दिन होम क्वारेन्टिन अनिवार्य गरिएको छ । यद्यपि कतारबाट बाहिरिँदा र कतार प्रवेश गर्दा ७२ घण्टा अगाडिको पीसीआरको नेगेटिभ रिपोर्ट भने अनिवार्य गरिएको कतारबारे जानकार प्रो. मोहम्मद रमजान अली मियाँले बताए ।-मध्यान्ह
प्रतिक्रिया लेख्नुहोस्:-