कोरोना महामारीका बीच पनि सुधार आउन लागेको वैदेशिक रोजगारीमा पुन: धक्का लाग्ने भएको छ । काठमाडौं उपत्यकाका जिल्ला प्रशासन कार्यालयहरुले वैदेशिक रोजगारीमा जाने कामदारलाई दिइने अभिमुखीकरण तालिम भौतिक उपस्थितिमा प्रदान गर्न निषेध गरेसंगै वैदेशिक रोजगारमा पुन: धक्का लाग्ने देखिएको छ ।
कोरोना महामारीको संक्रमण बढ्दै गएको भन्दै उपत्यकामा जिल्ला प्रशासन कार्यालयहरुले साउन २८ देखि भदौ ८ गतेसम्म निषेधाज्ञा थप गर्दै विभिन्न गतिविधि संचालनमा रोक लगाएका छन् । जसअनुसार बिहीबारदेखि (साउन २८) देखि विदेश जानेहरुले भौतिक उपस्थितिमा तालिम दिन पाउने छैनन् । हाल विदेश जानेहरुले हाल २ दिन भौतिक उपस्थितिमा नै तालिम लिनुपर्ने बाध्यता छ तर तालिम नै लिन नपाउने भएपछि विदेश जानका लागि अन्तर्वार्ताबाट छनौट भएका, भिसा आएका कामदारले श्रम स्वीकृति लिन पाउने छैनन् ।
अभिमुखीकरण तालिम प्रदायक संस्था देशका विभिन्न जिल्लामा संचालनमा रहेपनि धेरै संख्यामा काठमाडौं उपत्यकामा नै रहेका छन् । यधपी काठमाडौं उपत्यकामा तालिम लिन निषेध भएपनि अन्य जिल्लामा रहेका तालिम केन्द्रबाट तालिम लिन सकिने अवस्था भने कायमै छ तरपनि सबैको लागि सहज हुनेछैन ।
हाल प्रमुख श्रम गन्तव्य मुलुकहरु मलेसिया, युएई, कुवेत र बहराइन लगायत देशले नयाँ नेपाली कामदार लिएका छैनन् । साउदी, कतार रोमानिया लगायत केहि देशले मात्र तोकिएको शर्त पालना गर्नेगरी नेपाली कामदार लिइरहेका छन् । बजारमा डिमाण्ड कम तर विदेश जान चाहनेहरुको संख्या उल्लेख्य हुँदा लागत शुल्क न्यूनतम १ लाख २० हजार देखि बढ्दै गएको म्यानपावर व्यवसायीहरु बताउँछन् ।
प्रतिक्रिया लेख्नुहोस्:-