‘रस्टिक हाउस’ निर्माणले किसान खुसी

चरीकोट (दोलखा), साउन ३२ गते । आलु उत्पादन हुँदै आएको दोलखाको गौरीशङ्कर गाउँपालिका–६ स्थित चङ्खु गाउँमा रस्टिक हाउस निर्माण गरिएको छ । आलुको बजारीकरण र सुरक्षित भण्डारणका लागि समस्या झेल्दै आएकोमा स्थानीय किसानमा कृषि उत्पादनलाई सुरक्षित भण्डारण गर्न रस्टिक हाउस निर्माण भएपछि खुसी छाएको छ ।

रस्टिक हाउस निर्माणले एक पटक उत्पादन भएपछि वर्षभरि नै उक्त वस्तुमा निर्भर यहाँका नागरिकको जीवनस्तरमा परिवर्तन हुने आशा आफूमा जागेको स्थानीय लानुरी शेर्पा बताउनुहुन्छ । ७० लाख रुपियाँको लागतमा निर्माण भएको रस्टिक हाउसमा विशेषगरी आलु र किवी भण्डारण हुने जनाइएको छ ।
५० टन क्षमताको रस्टिक हाउस निर्माणका लागि बागमती प्रदेश सरकारबाट आव २०७७/७८ मा ३० लाख, स्थानीय थलदिङदेवी कृषि सहकारीबाट ३० लाख र गाउँपालिकाबाट १० लाख रुपियाँ प्राप्त भएको छ ।

त्यसैगरी वडा नं. ५ स्थित सुरीमा पनि ५० लाख रुपियाँको लागतमा ४० टन क्षमताको रस्टिक हाउस बनेको छ । बागमती प्रदेश सरकारको २० लाख, स्थानीय मयुर साना किसान सहकारीको २० लाख र गाउँपालिकाको १० लाख रुपियाँ सहयोगमा रस्टिक हाउस बनेको हो ।
नौवटा वडा रहेको गाउँपालिकामा पहिलो पटक चङ्खु र मार्बुमा रस्टिक हाउस निर्माण भएको गाउँपालिका अध्यक्ष स्वयंबहादुर खड्काले जानकारी दिनुभयो । आलुको पकेट क्षेत्र मानिएको यस क्षेत्रमा रस्टिक हाउस नहुँदा उत्पादित आलुको सुरक्षा र बजारीकरणमा चुनौती बनेकोमा अब किसानको उत्पादन र बजारीकरण मात्रै नभई आलुको बीउसमेत जोगाउन सकिने अध्यक्ष खड्काले बताउनुभयो ।