काठमाण्डाै – टोकियो पारा ओलम्पिकको तेक्वान्दोमा नेपालकी पलेशा गोवद्र्धन ऐतिहासिक पदकबाट वञ्चित भएकी छिन् ।
तोक्वान्दोको रेपेचेजतर्फ फाइनलमा चीनकी युजी लीसँग १२–९ ले पराजित भएपछि पलेशा नेपाली खेलकुद इतिहासमा पहिलो पदक जित्नबाट वञ्चित भएकी हुन् । पलेशा चीनकी लीलाई हराएको भए कास्य पदक जित्ने थिइन् ।
यसअघि महिला के ४४ विधाको ५८ केजी तौल समूहका प्रतिस्पर्धा गरेकी पलेशा प्रतियोगिताको पहिलो खेलमा बेलायतकी बेथ मुनरोसँग २१–८ ले पराजित भएपछि स्वर्ण पदकको सम्भावना सकिएको थियो । त्यसपछि रेपेचेजमार्फत कास्य पदकका लागि पलेशाले क्वाटरफाइनलमा अमेरिकाकी ब्रायना सालिनारोलाई १०–० ले हराउँदै सेमिफाइनलमा पुगेकी थिइन् ।
सेमिफाइनलमा पलेशाले सर्बियाकी खेलाडी मिसेभलाई २३–१५ ले हराउँदै चीनकी लीसँग भेट पक्का गरेकी थिइन् ।
ओलम्पिक स्पर्धामा नेपालका कुनै पनि खेलाडीले जित हासिल गरेको यो पहिलो पटक थियो ।
प्रतिक्रिया लेख्नुहोस्:-