रुपन्देही प्रहरीले भन्सार छलेको ११ लाख बराबरको सामान बरामद

काठमाडौँ, रुपन्देही प्रहरीले भन्सार छलेको ११ लाख ९ हजार ७३० बराबरको सामान बरामद गरेको छ। प्रहरीका अनुसार रुपन्देहीका विभिन्न ठाउँबाट मंगलबार उक्त बराबरको भन्सार छलेको सामान बरामद भएको हो। लु३३प ५०१८ नम्बरको मोटरसाइकल, लु१९प १३४१, लु२प ४२२५ र लु७१प १२५४ नम्बरको मोटरसाइकलबाट उक्त बराबरको सामान बरामद गरेको हो। प्रहरीले सिद्धार्थनगर नगरपालिका-४ बाट १ लाख १३ हजार बराबरको खसी र ब्रोइलर कुखुरा बरामद गरेको छ।

इलाका प्रहरी कार्यालय मर्चबारीबाट खटिएको टोलीले ३८ हजार रुपैयाँ बराबरको ब्रोइलर कुखुरा बरामद गरेको छ। यस्तै, इलाका प्रहरी कार्यालय रुपनेदेहीको टोलीले चिनी तथा किराना सामान, श्रंगारका सामानसहित लु७१प १२५४ नम्बरको मोटरसाइकलबाट ३ लाख ४ हजार बराबरको सामान बरामद गरेको छ। यसैगरी, इलाका प्रहरी कार्यालय बेलहियाको टोलीले १ लाख ३४ हजार रुपैयाँ बराबरको सामान बरामद गरेको छ। यस्तै, वडा प्रहरी कार्यालय भैरहवाबाट खटिएको टोलीले ३ लाख ६८० बराबरको सामान बरामद गरेको छ। यस्तै, इलाका प्रहरी कार्यालय धकधईबाट खटिएको टोलीले लु२प ४२२५ नम्बरको मोटरसाइकलबाट २ लाख २० हजार बराबरको मोबाइल बरामद गरेको छ। भन्सार चोरी तथा पैठारीमाथि निगरानी बढाउँदा सो बराबरको सामान बरामद भएको प्रहरी उपरीक्षक मनोज केसीले बताए। बरामद भएका ती सामान आवश्यक कारबाहीका लागि भन्सार कार्यालय पठाइएको उनले बताए।