काठमाडौं : वैदेशिक रोजगारमा गई मृत्यु वा अंगभंग भएका कामदारको करिब दुई करोड रुपैयाँ परराष्ट्र मन्त्रालयले आफ्नो खातामा राखेको भन्दै महालेखा परीक्षकको कार्यालयले प्रश्न उठाएको छ । केही समय अघि सार्वजनिक महालेखा परीक्षकको कार्यालयको प्रतिवेदनले कतारको दोहास्थित नेपाली दूतावासबाट २०७६ साल पुस २ गते नाम र नेपालको ठेगाना खुल्न नसकेका मृतक र घाइतेहरुको क्षतिपूर्ति वापतको १ करोड ६० लाख ७० हजार प्राप्त भएकोमा उक्त रकम हालसम्म मन्त्रालयकै खातामा रहेको भन्दै उक्त प्रश्न उठाएको हो ।
वैदेशिक रोजगारीका सिलसिलामा गन्तव्य मुलुकमा मृत्यु वा घाइते भएका नेपाली नागरिकको क्षतिपूर्ति वापतको रकम सम्बन्धित रोजगार कम्पनी तथा बिमा कम्पनीबाट प्राप्त हुने रकम नेपाली नियोगहरुमार्फत परराष्ट्र मन्त्रालयमा प्राप्त हुने र मन्त्रालयले मृत्यु, घाइते भएका व्यक्तिको स्थायी ठेगानामा रहेको जिल्ला प्रशासन कार्यालयमा पठाउने गरेको छ ।
गत वर्ष विभिन्न मुलुकमा मृत्यु र घाइते भएका ३ सय ८ जनाको क्षतिपूर्ति वापतको २७ करोड १४ हजार रुपैयाँ परराष्ट्र मन्त्रालयले सम्बन्धित जिल्ला प्रशासन कार्यालयमा पठाएको भएपनि प्रतिवेदनले मृृतक तथा घाइतेका हकवालाले क्षतिपूर्ति वापतको रकम प्राप्त गरे÷नगरेको सम्बन्धमा परराष्ट्र मन्त्रालयले जिल्ला प्रशासन कार्यालयबाट प्रतिवेदन लिई अनुगमन नगरेको भन्दै हकवालाले क्षतिपूर्ति रकम प्राप्त गरे÷नगरेको सम्बन्धमा मन्त्रालयले नियमित तथा आवधिक अनुगमन गर्नुपर्ने उल्लेख गरेको छ । प्रतिवेदनले गन्तव्य मुलुकबाट आएको मृतक र घाइतेको रकम उनीहरुका आश्रित परिवारले नपाए मन्त्रालयको खातामा नराखी उक्त संचित कोषमा दाखिला गर्न पनि सुझाव दिएको छ ।
प्रतिक्रिया लेख्नुहोस्:-