काठमाडौं : कुवेतले आगामी अक्टोबरदेखि सबै प्रकारका भिसा खुला गर्ने तयारी गरेको छ । लामो समयपछि भिजिट भिसा खुला गर्ने तयारी गरेको कुवेतले सबै प्रकारका भिसा खुला गर्न लागेको हो । कुवेतको आन्तरिक मन्त्रालयका अनुसार कुवेतले पारिवारिक, व्यापारिक र यात्रा प्रयोजनका लागि भिजिट भिसा जारी गर्दै आएको छ । अरबी दैनिक पत्रिका अल राईका अनुसार विभिन्न देशसँग सिधा हवाई उडान शुरु गरेको कुवेतले आगामी अक्टोबर शुरुदेखि भिजिट भिसा खुला गर्ने बताइसकेको छ ।
कुवेतले आफ्नो मुलुकमा कोराना भाइरस संक्रमण दर घटेको र खोप पनि पर्याप्त भएको भन्दै भिजिट भिसा खुला गर्न लागेको उक्त पत्रिकाले उल्लेख गरेको छ । कुवेतमा निर्माण सल्लाहकार, ईन्जिनियर, प्राविधिक, र शिक्षकहरुको माग अत्यधिक बढेको बताइएको छ । यता ओमानले शाही आदेश जारी गर्दै आप्रवासी कानूनमा केही संशोधन गरेको छ । ओमानले विदेशी कामदारहरुले आफ्नो भिसाको म्याद सकिन १५ दिन अगावै नवीकरण गर्नुपर्ने नयाँ नियम ल्याएको हो । संशोधित नयाँ नियम अनुसार कुनै पनि विदेशी कामदारले आफ्नो श्रीमान श्रीमतीलाई भिसा प्रदान गर्दा उनीहरुमा आश्रित बालबच्चालाई पनि स्वतः भिसा लागेको मान्ने भएको छ ।
प्रतिक्रिया लेख्नुहोस्:-