इजरायलको लागि परीक्षा दिदा पालना गर्नु पर्ने नियम हरु

काठमाडौं | बिभागका अनुसार २८ गते हुने भाषा परीक्षाको लागि काठमाडौं उपत्यकाका १६ वटा शैक्षिक संस्थामा परीक्षा केन्द्र तोकिएका छन् । अनलाइन आवेदन स्वीकृत भएकाहरुले https://ferms.dofe.gov.np मा गई आफ्नो युजर आइडी र पासवर्ड मार्फत लगइन गरि प्रवेशपत्र प्राप्त गर्न सक्छन् । जसलाई प्रिन्ट गरि तोकिएको परीक्षा केन्द्रमा परीक्षाको लागि जानुपर्नेछ । परीक्षा दिन तीन घण्टा अगावै जानुपर्ने र आफूसाथमा आफ्नो परिचय खुल्ने कागजपत्र समेत लिएर जानुपर्ने बिभागले जनाएको छ ।

बिभागले गोलाप्रथाबाट अन्तिम छनौट हुने हुँदा इजरायल रोजगारमा जान पाईने आशामा कुनै प्रकारको आर्थिक चलखेल नहुने बताउंदै आएको छ । बिभागले इजरायली पक्षलेनै गोलाप्रथा गर्ने हुँदा भाषा परीक्षा तथा अन्तर्वार्तामा सबैभन्दा अब्बल नम्बर ल्याउने व्यक्तिसमेत गोलाप्रथामा फालिन सक्ने हुँदा कसैले पनि इजरायल रोजगारमा जान ग्यारेन्टी गरेर चलखेल गर्न नसक्ने बताएको छ ।

बिभागका अनुसार भदौ २८ गते हुने परीक्षाको लागि उम्मेदवारहरुले निम्न नियमहरु १० नियम पालना गर्नुपर्ने छ ।
१) परीक्षा दिन आउँदा अनिवार्य रुपमा राहदानी सहित प्रवेशपत्र ल्याउनु पर्नेछ । प्रवेशपत्र विना परीक्षामा बस्न पाइने छैन ।
२) परीक्षा हलमा मोबाइल फोन ल्याउन पाइने छैन ।
३) लिखित परीक्षाको नतिजा प्रकाशन भएपछि शारीरिक परीक्षण तथा अन्तर्वार्ता हुने दिनमा पनि प्रवेशपत्र ल्याउनु आनिवार्य छ।
४) उम्मेदवारले परीक्षा दिएको दिनमा हाजिर अनिवार्य रुपले गर्नुपर्नेछ ।
५) विभागले सूचनाद्वारा निर्धारण गरेको कार्यक्रम अनुसार परीक्षा संचालन हुनेछ।
६) बिरामी भएको उम्मेदवारले परीक्षा हलमा प्रवेश गरी परीक्षा दिने क्रममा निजलाई केही भएमा विभाग जवाफदेही हुने छैन ।
७) परीक्षा शुरु हुनु भन्दा ३० मिनेट अगाडि घण्टीद्वारा सूचना गरेपछि परीक्षा हलमा प्रवेश गर्न दिइनेछ । वस्तुगत परीक्षा शुरु भएको १५ मिनेट पछि आउने उम्मेदवारले परीक्षामा बस्न पाउने छैन ।
८) परीक्षा हलमा उम्मेदवारले परीक्षाको मर्यादा विपरीत कुनै काम गरेमा केन्द्राध्यक्षले परीक्षा हलबाट निष्काशन गरी तुरुन्त कानून बमोजिमको कारवाही गर्नेछ र त्यसरी निष्काशन गरिएको उम्मेदवारको सो विज्ञापनको परीक्षा स्वतः रद्द भएको मानिने छ ।
९) परीक्षा हलमा प्रवेश गरेपछि किताब, कापी, कागज, चिट आदि आफू साथ राख्नु हुँदैन । उम्मेदवारले आपसमा कुराकानी र संकेत समेत गर्नु हुँदैन ।
१०) कुनै उम्मेदवारले प्रश्नपत्रमा रहेको अस्पष्टताको सम्बन्धमा सोध्नु पर्दा पनि परीक्षामा सम्मिलित अन्य उम्मेदवारहरुलाई बाधा नपर्ने गरी निरीक्षकलाई सोध्नु पर्नेछ ।