हिमाल आरोहणबाट दश दिनमै २ करोड २८ लाख राजस्व संकलन

पर्यटन विभागले हिमाल आरोहण शूल्क बापत २ करोड २८ लाख रुपैयाँ राजस्व संकलन गरेको छ । हिमाल आरोहणको अनुमति दिन सुरु गरेको सुरुवाती १० दिनमै विभागले उक्त राजस्व संकलन गरेको हो । विभागले यही भदौ १५ गतेदेखि आरोहण अनुमति दिन सुरु गरेको थियो । हालसम्म धौलागिरी, कञ्चनजङ्गा र मरियाङ हिमाल आरोहणका लागि पर्यटकले अनुमति लिएका छन् ।

यीमध्ये सबैभन्दा बढी मनास्लु हिमाल आरोहणको अनुमति बापत सबैभन्दा बढी १ करोड ८० लाख रुपैयाँ राजस्व संकलन भएको छ । यसपछि धौलागिरी हिमालको आरोहण शूल्कबापत ४२ लाख, कञ्चनजंगा आरोहण शूल्क बापत ३ लाख र मरियाङ आरोहण शूल्कबापत करिब २ लाख रुपैयाँ संकलन भएको विभागले जानकारी दिएको छ ।

नेपालमा कोरोना संक्रमणको दर कम भएसँगै पर्वतीय पर्यटकहरुको संख्या पनि बढ्दै गएको छ । पछिल्लो १ महिनाको अवधिमा हिमाल आरोहणको अनुमति लिने पर्यटक बढेसँगै पर्वतीय पर्यटन सुरु भएको हो । यो महिना मनास्लु हिमाल आरोहणका लागि मात्र १८६ आरोहीले अनुमति लिएका छन् ।