करिम बेन्जेमाको ह्याट्रिकको मद्दतले दुईपटक गोलले पछि परेको स्थिति उल्टाउँदै रियल म्याड्रिडले सेल्टाभियोमाथि शानदार जीत हासिल गरेको छ । आफ्नो घरेलु मैदानमा ५६० दिन पछि फर्किएको रियलले ५–२ को जीत हासिल गरेको हो । सान्टी मिनाले पाहुना टोलीलाई खेलको शुरुवातमा नै अग्रता दिलाए पनि बेन्जेमाले बराबरी गोल फर्काएका थिए । फेरि फ्रान्को कर्भीले सेल्टालाई अग्रता दिलाए भने बन्जेमाले पुनः खेल बराबरी गरे ।
भिनिसियस जुनियरले रियलका लागि तेस्रो गोल गरे भने युवा खेलाडी एडवार्डो कामाभिङ्गाले डेब्यूको छैटौँ मिनेटमा गोल गरे । ८७ औँ मिनेटमा गोल गर्दै बेन्जेमाले आफ्नो ह्याट्रिक पूरा गरे । जीतसँगै कार्लो एन्चेलोटीको टोली ला लिगाको शीर्ष स्थानमा उक्लिएको छ । रियलले सन् २०२० को मार्च १ पछि सान्टिायागो बर्नेबेउमा पहिलो खेल खेलेको हो । त्यतिबेला रियलले बार्सिलोनालाई एलक्लासिकोमा हराएको थियो । पहिलो खेलमा ३० हजार समर्थकहरुलाई मैदान प्रवेश गर्न अनुमति दिइएको थियो ।
उता, एथ्लेटिको म्याड्रिडले पनि एक गोलले पछि परेको स्थिति उल्टाउँदै नवप्रवेशी एस्पानियोललाई २–१ गोलले पराजित गरेको छ । राउड डे टोमासले एस्पानियोललाई अप्रत्यासित अग्रता दिलाएका थिए । तर ७९ औँ मिनेटमा यानिक कारास्कोले बराबरी गोल फर्काए भने फ्रेन्च मिडफिल्डर थोमास लेमारले इन्जुरी समयमा गोल गदै साबिक विजेतालाई महत्त्वपूर्ण ३ अंक दिलाए । त्यस्तै, भ्यालेन्सियाले ओसासुनालाई ४–१ ले हरायो । रियल, भ्यालेन्सिया र एथ्लेटिकोको समान १० अंकपछि गोलअन्तरको आधारमा क्रमशः पहिलो, दोस्रो र तेस्रो स्थानमा छन् ।
प्रतिक्रिया लेख्नुहोस्:-