काठमाडौँ | जापान सरकारले कोभिड-१९ सिमा नियन्त्रण उपाय अन्तर्गत लगाएको प्रतिबन्धपछि नेपालबाट जापान प्रवेश रोकिएका रि-ईन्ट्रि बाहकले अब सिधा प्रवेश पाउने भएका छन् ।
जापानको बिदेश मन्त्रालयले सेप्टेम्बर १७ तारिख मध्यरात प्रकाशित गरेको सूचना अनुसार सेप्टेम्बर १९ तारिख मध्यरात पछि अर्थात् सेप्टेम्बर २० बाट जापानको रि-ईन्ट्रि भिषा भएकाहरु नेपालबाट सिधा वा ट्रान्जिट उडान हुँदै सहज रुपमा जापान आउन पाउनेछन् । यसका लागि जापानको आवसिय भिषा बाहक सबै समेटिएका छन् ।
जापानको रोजगार, डिपेण्डेन्ट, बिजनेस, विद्यार्थी लगायत सबै रि-ईन्ट्रि भिषा भएकाहरुले सेप्टेम्बर २० आईतबारबाट नेपालबाट सिधा प्रवेश पाउनेछन् । यसमा जापानको एईजु, तेईजु लगायतले भने पहिलो देखिनै सिधा प्रवेश पाइराखेका थिए ।
तर यसमा उल्लेखित भिषा भएर नेपालमा रहँदा रि-ईन्ट्रि भिषाको म्याद गुज्रेका वा पहिलो पटक भिषा पाएर जापान हालसम्म प्रवेश नगरेकाहरुले भने अझै जापान प्रवेशको लागि अर्को सूचना जारी नभएसम्म कुनुपर्ने भएको छ । अर्थात् तत्काल यस्ता भिषामा रहेका वा पाएकाहरुले जापान प्रवेश गर्न सक्नेछैनन् ।
यस्तो छ जापान प्रवेश पूर्व र प्रवेशपछि अपनाउनुपर्ने नियमहरु
१. जापान प्रवेश गर्नुपूर्व ७२ घण्टा भित्रको कोरोना भाइरस संक्रमण परीक्षणको नकारात्मक रिपोर्ट चाहिने छ ।
२. जापान प्रवेश पूर्व यात्रीहरुले अनिवार्य रुपमा तीनवटा मोबाईल एप्लिकेसन आफ्नो स्मार्टफोनमा डाउनलोड गरेर राख्नुपर्नेछ । यसको अर्थ हरेक यात्रीको साथमा स्मार्टफोन हुनु आवश्यक छ । ती एप्लिकेसनहरुमा कन्ट्याक्ट ट्रेसिगं एप कोकोआ, सरकारकै ओस्सामा लोकेशन कन्फर्मेशन एप र स्काइप रहेको छ । यदि यात्रीले साथमा स्मार्टफोन नबोकेमा बिमानस्थलबाट दुई साताको लागि भाडामा स्मार्टफोन लिनुपर्नेछ । त्यसको रकम बिमानस्थलले तोकेको नियमानुसार हुनेछ ।
३. जापान आईपुगेपछि बिमानस्थलमा कोभिड १९ परीक्षण हुनेछ । यदि कोरोना सकारात्मक पाइएमा उपचारको लागि तोकिएको स्थानमा बस्नुपर्नेछ । नकारात्मक देखिएमा तीन दिन तोकिएको होटलमा बस्नुपर्नेछ । हालसम्म होटलमा बस्दाको खर्च जापान सरकारलेनै व्यहोर्दै आएको छ ।
४. चौथो दिनमा होटल क्विरिन्टिनबाट घर प्रवेश गर्नुअघिनै कोरोनाको पीसीआर परीक्षण हुनेछ । नकारात्मक आएमा घर जान पाइनेछ भने सकारात्मक देखिएमा पुन थप आवश्यक दिन उपचारार्थ बस्नुपर्नेछ । यसअघिको नियमानुसार ६ दिन होटल क्वारिन्टिन बस्नुपर्ने नियम रहेको थियो ।
५. चौथो दिन होटलबाट घर जाँदा निजि गाडीको प्रयोग आफैंले व्यवस्थापन गर्नुपर्नेछ । निजि सवारी बाहेक सार्वजनिक बस, रेल वा ट्याक्सि प्रयोग गर्न पाईंदैन । निजि गाडीको व्यवस्थापन गरेर जान नसकेमा होटलमानै थप ११ दिन बस्नुपर्नेछ । तर ११ दिन बस्दाको खर्च भने होटलले तोके अनुसार आफैंले तिर्नुपर्नेछ ।
६. होटलबाट घर जानुअघि जापान ईमिग्रेसन कोभिड नियन्त्रण उपाय सबै पालना गर्छु भन्ने लिखित कागज गर्नुपर्नेछ । जसमा सबै कुरा पालना गर्छु नगरेमा तोकिएको कानुनी दण्ड सजाय भोग्छु भन्ने उल्लेख हुन्छ । सम्झौताको नियम उल्लंघन गरेमा नेपाल फिर्ता पठाउनसक्ने सम्मको कानुनी अधिकार रहेको छ ।
७. घर आईसकेपछि ईमिग्रेसन अधिकारीहरुले स्काईपमा आवश्यक परेको समय र दिनमा भिडियो कल गरेर अवस्थाको बारेमा जानकारी लिन र कहाँ छ भनेर बुझ्न सक्नेछन् । यस बाहेक आकस्मिक रुपमा तपाईं रहेको घरमा चेकजाँचका लागि समेत आउनसक्नेछन् । मोबाइलमा राखिएको एप्लिकेशनको माध्यमबाट व्यक्ति कहाँ छ भनेर चेकजाँच गरिनेहुँदा छलकपट वा गलत काम गरेर फन्दामा पर्न सकिनेछ । दैनिक स्वास्थ्यबारे जानकारी गराएपछि १४ दिनपछि सामान्य अवस्थामा आफ्नो काम दैनिकी सुरु गर्न सकिनेछ ।
प्रतिक्रिया लेख्नुहोस्:-