काठमाडौं : गैरआवासीय नेपाली संघ (एनआरएनए)का अभियन्ताहरूले वैदेशिक रोजगार लामो समयसम्म नेपाली अर्थतन्त्रको अभिन्न रहने भन्दै यस क्षेत्रलाई व्यवस्थापन गर्नुपर्नेमा जोड दिएका छन् । वैदेशिक रोजगार पत्रकार समाजको नवनिर्वाचित कार्यसमितिलाई सोमबार सम्मानित गर्दै एनआरएनएका अभियन्ताहरूले उक्त धारणा राखेका हुन् ।
सोमबार राजधानीमा आयोजित कार्यक्रममा संघको तर्फबाट सचिव राजेन्द्र कुमार (आरके) शर्मा, सल्लाहकार टिबि कार्की, एशिया प्यासिफिक क्षेत्रका उपाध्यक्ष खगेन्द्र न्यौपानेले संयुक्तरूपमा समाजको नवनिर्वाचित कार्यसमितिका सदस्यहरूलाई सम्मान गरेका थिए ।
कार्यक्रमलाई सम्बोधन गर्दै सचिव शर्माले विपन्न अवस्थाका लाखौं नेपाली कामदार वैदेशिक रोजगारीमा जाने खाडीका विभित्र मुलुक र मलेसिया लामो समयदेखि ओझेलमा परेको भएपनि हाल यो क्षेत्र संघको केन्द्रीय एजेन्डाका रूपमा स्थापित भएको बताए ।
नेपाली नियोगहरले नेपाली कामदारको समस्या समाधानका लागि प्रयास गरिरहेको भएपनि साधन र स्रोतको अभाव रहेका ठाउँमा एनआरएनएले हातेमालो गरी काम गरेका कारणले विषम परिस्थितिमा पनि नेपाली कामदाहरूले अविभावक नभएको महसुस गर्नु नपरेको दाबी गरे ।
नेपालबाट वैदेशिक रोजगारीमा जाने कामदारको ठूलो पङ्क्ति सीपविहीन अवस्थामा रहेको भन्दै उनले वैदेशिक रोजगार पत्रकार जस्ता जनचेतनामूलक काम गर्ने संस्थाले सीप र दक्षताका पक्षमा जोड दिनुपर्ने सुझाव दिए । वैदेशिक रोजगार क्षेत्रलाई अगाडि बढाउने मूल लक्ष्य राखेर संघको उपाध्यक्ष पदमा उम्मेदवारी दिएको दाबी गदै उनले एनआरएनएलाई वैदेशिक रोजगारसहित विदेशमा रहेका नेपालीहरूको विवादरहीत साझा चौतारी बनाउने आफ्नो अभियान रहेको बताए ।
शर्माले नेपाल सरकारले अन्यायमा परेका नेपाली कामदारको तर्फबाट निःशुल्क कानूनी सेवा उपलब्ध गराउने कार्यविधि बनाएको भएपनि वैदेशिक रोजगारीमा विभिन्न कारणले कानूनी समस्या पर्ने नेपाली कामदारले त्यसबाट लाभ लिन नसकेको भन्दै सरकारले प्रभावकारी अनुगमन समस्यामा परेका कामदारहरूलाई सहयोग पु¥याउनु पर्ने माग समेत गरे ।
संघका सल्लाहकार कार्कीले वैदेशिक रोजगारमा रहेका नेपाली कामदारहरूलाई सुरक्षित गराउन अनुसन्धानमुलुक पत्रकारिताको खाँचो रहेको भन्दै समाजले त्यसको नेतृत्व लिन सक्नुपर्ने सुझाव दिए । जोखिमपूर्ण पत्रकारिताका लागि पत्रकारको सुरक्षा हुनुपर्ने भन्दै उनले समाजले तत्काल पत्रकार कल्याणकारी कोष स्थापना गर्नुपर्ने सुझाव दिए । कोष खडा भएमा आफुसहित एनआरएनए अभियन्ताहरूले सहयोग गर्ने प्रतिवद्धता जनाए । कार्कीले पनि सुरक्षित वैदेशिक रोजगारको पक्षलाई संघको मूल एजेन्डामा ल्याउन संघर्षपूर्ण यात्रा गरेको दाबी गर्दै वैदेशिक रोजगारीमा जाने नेपाली कामदारको सुरक्षा र संरक्षण संघको मूल एजेन्डा हुनुपर्नेमा जोड दिए ।
एशिया प्यासिफिक क्षेत्रका उपाध्यक्ष खगेन्द्र न्यौपाने, उपाध्यक्षका उम्मेदवार हरि भट्टराई, नेपाल पत्रकार महासंघ कोरिया शाखाका अध्यक्ष रञ्जन कुँवरलगायतले समाजको नवनिर्वाचित कार्यसमितिलाई कार्यकाल सफलताको शुभकामना व्यक्त गरेका थिए ।
प्रतिक्रिया लेख्नुहोस्:-