काठमाडौं : नेपाल वैदेशिक रोजगार व्यवसायी संघले वैदेशिक रोजगारको गोप्य उद्देश्य राखेर व्यापकरूपमा नेपाली कामदार खाडी मुलुक जाने गरेको भन्दै संसदीय समितिको ध्यानाकर्षण गराएको छ ।
प्रतिनिधिसभा, उद्योग तथा वाणिज्य र श्रम तथा उपभोक्ता हित समितिको शुक्रबार बसेको बैठकमा संघका तृतीय उपाध्यक्ष किशोर केसी तथा सचिव मेघनाथ भुर्तेलले समितिको ध्यानाकर्षण गराएका हुन् ।
कोरोना भाइरस (कोभिड–१९) संक्रमण कम भएपछि भिजिट भिसामा गई उतै रोजगारी खोज्ने र रोजगारी नपाउँदा समस्यामा परेकाले सरकारले कडाइ गर्नुपर्ने आवश्यकता रहेको उपाध्यक्ष केसीले बताए । यूएईमा नेपाली बेरोजगार युवाहरु मानव तस्करहरुको प्रलोभनमा परी अलपत्र पर्ने गरेका छन् । भिजिट भिसामा गई स्वतन्त्रपूर्वक कम्पनी परिवर्तन गर्दै आकर्षक तलबमा काम गर्न पाइने भन्दै दलालहरुले भड्काएर प्रलोभनमा पार्ने गरेको विषय राखेको पनि उपाध्यक्ष केसीले बताए ।
भिजिट भिसाको तीन महिने अवधि सकिएपछि उनीहरु ओभरस्टे भएर समस्यामा पर्ने गरेका छन् । नेपालबाट हुने मानव तस्करी रोक्न भिजिट भिसामा विदेश जाने यात्रुहरुमाथि सोधखोज र अनुगमन गर्न त्रिभुवन अन्तर्राष्ट्रिय विमानस्थलस्थित अध्यागमनका कर्मचारीललाई विशेष जिम्मेवारी दिइएको छ । तर त्यहाँ खटिएका कर्मचारीले अनुगमन र नियन्त्रणको बदला विगतदेखि नै मानव तस्करीको धन्दा गर्ने गिरोहसँग मिलेर भिजिट भिसामा पठाउने गरेको स्रोत बताउँछ । यो समाचार मध्यान्ह दैनिक मा प्रकाशित छ ।
प्रतिक्रिया लेख्नुहोस्:-