काठमाडौं : श्रम, रोजगार तथा सामाजिक सुरक्षा मन्त्रालयका सचिव सुर्य प्रसाद गौतमले वैदेशिक रोजगार व्यवसायीले लिने सेवा शुल्क परिमार्जन गर्न सबै पक्षले हिम्मत गर्ने बेला आएको दोहोर्याएका छन् । वैदेशिक रोजगार पत्रकार समाजको नवनिर्वाचित कार्यसमितिलाई मन्त्रालयमा स्वागत गर्दै उनले उक्त धारणा दोहोर्याएका हुन् ।
यसअघि प्रतिनिधिसभाको उद्योग तथा वाणिज्य र श्रम तथा उपभोक्ताहित समितिको गत शुक्रबार बसेको बैठकमा सेवा शुल्क १० हजार तोकिएका मुलुकमा रोजगारीमा पठाउँदा नागरिक र सरकार दुबै ठगिएको सचिव गौतमले बताएका थिए । मंगलबारको भेटमा पनि सचिव गौतमले सेवा शुल्क परिमार्जन पछि वैदेशिक रोजगारलाई व्यवस्थित गर्न सहज हुने बताए ।
उनले भने, ‘सरकारलाई तोकिएको रकम कागजातमा देखाइने गरिए पनि वैदेशिक रोजगार व्यवसायीहरूले त्योभन्दा बढी रकम लिइरहेका छन् । एकातिर देखाउने रकम कम भएकाले राजस्वमा कमी हुने र अर्कातिर नागरिकसँग प्रमाण नहुने हुँदा ठगी वा मर्कामा पर्दासमेत न्याय पाउन गाह्रो भएको छ ।’
सचिव गौतमले सेवा शुल्क परिमार्जन गर्दा कामदारले पाउने एक महिनाको तलब बराबरको लिन पाउने व्यवस्था गर्नु उचित हुने पनि बताए । उनले भने, ‘अरु कतिपय देशमा जस्तै श्रमिकको एक महिनाको तलब सेवा शुल्क लिने गर्दा ठीक हुनेछ । एक महिनाको तलब बराबरको सेवा शुल्क वैधानिकरूपमा लिन पाउने व्यवस्था भए व्यवसायीले सकेसम्म धेरै तलबको डिमाण्ड खोज्न उत्प्रेरित हुनेछन्, त्यसले न्यून तलबमा कामदार पठाउने हालैको बाध्यता पनि अन्त्य गर्न सहयोग गर्नेछ ।’
त्यस अवसरमा उनले नेपाली कामदार जापान पठाउने निर्देशिका छिट्टै पारित हुने, दक्षिण कोरियासँगको श्रम सम्झौता नवीकरण गर्ने तयारी रहेको भन्दै कोरिया र नेपालबीच सिधा उडान र नेपाली कामदारको क्वारेन्टिन बसाइको समस्या समाधान हुनासाथ नेपाली कामदार दक्षिण कोरियाको रोजगारीमा जान पाउने बताए ।
अदक्ष कामदार गइरहेको कतारमा सरकारी कोटामा कामदार पठाउँदा उनीहरू सुरक्षित हुने र तलब पनि आकर्षक पाउने भएकाले कतार प्रहरीको डिमाण्ड प्रमाणीकरणको अनुमति दिइएको भन्दै उनले कतार प्रहरीमा नेपाली पठाउन म्यानपावर कम्पनी स्वतन्त्र रहेको बताए । ‘केही अनियमितताको समाचार आएका छन्, त्यसमा मन्त्रालय सचेत छ,’ सचिव गौतमले भने ।
सचिव गौतमले वैदेशिक रोजगारको सुधार, आन्तरिक रोजगारी तगा सीप वृद्वि, सामाजिक सुरक्षा कोषमा आवद्वता र प्रधानमन्त्री रोजगार कार्यक्रममार्फत रोजगारी सिर्जना गरी बेरोजगार समस्याको समाधान मन्त्रालयको प्राथमिकतामा रहेको जानकारी दिए ।
उनले इजरायलमा कामदार पठाउने क्रमलाई तीव्ररूपमा अघि बढाइएको र परिणाम पनि सोही अनुसार आएको भन्दै मन्त्रालयले अन्य कामहरूलाई पनि तिव्रताका साथ लैजाने बताए ।
प्रतिक्रिया लेख्नुहोस्:-