काठमाडौं– वैदेशिक रोजगार गन्तव्य मुलुकमध्ये कतार र कुवेतमा कोरोनाका कारण ज्यान गुमाउनेको संख्या शून्यमा झरेको छ । कुवेतमा पछिल्लो सात महिनापछि बुधबार पहिलोपटक कोरोनाबाट कुनै पनि व्यक्तिको मृत्यु नभएको हो भने कतारमा पनि पछिल्लो समय ८ जुलाईपछि एक जनाको मात्रै मृत्यु भएको तथ्यांकले देखाएको छ ।
कुवेतमा फेब्रुअरी महिनापछि बुधबार कुनै पनि व्यक्तिको कोरोनाका कारण मृत्यु नभएको वल्ड्रोमिटरले जनाएको छ । कुवेतमा २ अप्रिल २०२० पछि बुधबार संक्रमणदर पनि अहिलेसम्कै कम रहेको बताइएको छ । बुधबार कुवेतमा कुनै पनि व्यक्तिले ज्यान नगुमाएको र ३३ जनामा संक्रमण पुष्टि भएको तथ्यांकले देखाएको छ । कुवेतमा हालसम्म कोरोनाका कारण २ हजार ४ सय ४८ जनाको मृत्यु भएको तथ्यांकले देखाएको छ । त्यहाँ हालसम्म ४ लाख ११ हजार ६ सय ५ जना संक्रमित भएका छन् । त्यसमध्ये ४ लाख ८ हजार ४ सय ९९ जना निको भएका छन् भने सक्रिय संक्रमितको संख्या ६ सय ५८ जना रहेको देखिएको छ ।
त्यस्तै नेपालीको अर्को श्रम गन्तव्य मुलुक कतारमा भने पछिल्लो समय २६ सेप्टेम्बरमा एक जनाको मृत्यु भएको छ । यो ८ जुलाई पछि मृत्यु हुने पहिलो केस भएको बताइएको छ । कतारमा पछिल्लो समय कोरोनाका कारण मृत्यु हुनेको संख्या नियन्त्रणमा रहेको त्यहाँको स्वास्थ्य मन्त्रालयले जनाएको छ । कतारमा हालसम्म कोरोनाका कारण ६ सय ५ जनाको मृत्यु भएको छ । जुन खाडी मुलुकमा सबैभन्दा कम संख्या हो । त्यहाँ कोरोनाबाट हालसम्म २ लाख ३६ हजार ५ सय ५८ जना संक्रमित भएका छन् भने निको हुनेको संख्या २ लाख ३४ हजार ६ सय ७१ रहेको वल्ड्रोमिटरको तथ्यांकले देखाएको छ । सक्रिय संक्रमितको संख्या १ हजार २ सय ८२ जना रहेको छ ।
यसैबीच, कतारमा ३ अक्टोबरदेखि मास्क अनिवार्यको व्यवस्था हटाउने निर्णय गरिएको छ । बुधबार बसेको कतारको मन्त्रिपरिषद्को बैठकले ३ अक्टोबरदेखि बाहिरी काममा मास्क अनिवार्यको व्यवस्था हटाउने निर्णय गरेको त्यहाँका स्थानीय सञ्चार माध्यमले जनाएका छन् । तर, सार्वजनिक कार्यक्रम, बजार र प्रदर्शनीहरूमा भने मास्क अनिवार्य नै लगाउनु पर्ने बताइएको छ । यसका साथै बजार र मलहरू पनि पूर्ण रूपमा सञ्चालन हुन पाउने व्यवस्था गरिएको समाचारमा जनाइएको छ ।
त्यस्तै संग्रहालय र सार्वजनिक पुस्तकालय पनि पूर्णरूपमा सञ्चालन गर्न पाइने बताइएको छ । सरकारी र निजी क्षेत्रका कार्यालयलाई पनि पूर्णरूपमा सञ्चालनका लागि अनुमति दिइएको छ । त्यस्तै मस्जिद, विद्यालय, अस्पताललगायत स्थानमा जाँदा भने मास्क अझै पनि अनिवार्य नै गरेको छ । भित्री रेस्टुरेन्ट र क्याफेहरू ७५ प्रतिशत क्षमतामा खुल्न पाइने तर बन्द ढोकाभित्र हुने कार्यक्रममा भने मास्क अनिवार्य लगाउनु पर्ने निर्णय भएको समाचारमा जनाइएको छ ।
प्रतिक्रिया लेख्नुहोस्:-