नेपालको प्रदेश १ र प्रदेश २ बाट वैदेशिक रोजगारीका लागि खाडी मुलुक जाने कामदार अत्याधिक देखिएका छन् । सेन्टर फर माइग्रेसन एण्ड इन्टरेशनल रिलेसन (सीएमआईआर) ले गत वर्ष गरेको अध्ययनमा उक्त अवस्था देखिएको हो । अध्ययन प्रतिवेदन शनिवार पोखरामा सार्वजनिक गरिएको थियोे ।
अनुसन्धानकर्ता युवराज नेपालका अनुसार वैदेशिक रोजगारीमा खाडी मुलुक जाने अधिकांश नेपाली कामदार अदक्ष तथा अर्धदक्ष देखिएका छन् । आवश्यक सीप र दक्षता विना गएका कामदार ठगिने र श्रम शोषणमा पर्ने पाइएको पनि नेपालले बताए ।
वैदेशिक रोजगारीका क्रममा ठगिने कामदार केही म्यानपावर कम्पनी मार्फत जाने भए पनि अधिकांश शैक्षिक कन्सल्टेन्सीबाट ठगिएको पाइएको भन्दै उनले शैक्षिक कन्सल्टेन्सीहरूले विद्यार्थीलाई विदेश अध्ययन गर्न भिसा सहजीकरण गर्ने भए पनि उनीहरुले वैदेशिक रोजगारीमा पठाउने एजेन्टको अवैधानिक काम गरिरहेको दावी समेत गरे ।
अनुसन्धानकर्ता नेपालले वैदेशिक रोजगारीमा जाने कामदारहरूले राहदानी बनाउनेदेखि अन्य सरकारी सेवा लिने कार्यालयबाट पनि सहजरूपमा सेवा पाउन नसकेको उल्लेख गरेका छन् ।
व्यवस्थापिका संसदको अन्तर्राष्ट्रिय सम्बन्ध तथा श्रम समितिले खाडी तथा अन्य मुलुकमा नेपाली महिलाहरूलाई घरेलु महिला कामदार पठाउन प्रतिबन्ध लगाएपनि गैरकानुनी रूपमा विदेशिने क्रम यथावत रहेको अनुसन्धानमा देखिएको बताए ।
नेपालबाट वैधानिक रूपमा जान प्रतिबन्ध लागाईएपछि धेरै महिला अवैध तरिकाले भारतीय विमानस्थल हुँदै खाडी तथा अन्य मुलुक पुगिरहेको भन्दै उनले यसले जोखिम बढाएको बताए ।
उनले गण्डकी प्रदेशका धेरैजसो युवा खाडी मुलुक जाने गरेको पाइएको भन्दै उक्त प्रदेशबाट वैदेशिक रोजगारीमा गएका मध्ये ८० प्रतिशत खाडी तथा मलेसिया जाने गरेको पनि बताए । यो समाचार मध्यान्ह दैनिक मा प्रकाशित छ ।
प्रतिक्रिया लेख्नुहोस्:-