काठमाडौं : वैदेशिक रोजगार विभागका महानिर्देशक दिपक काफ्लेमाथि कार्यकक्षमा दुर्व्यवहार भएको छ । आइतबार बिहान कार्यालय खुलेको केही समयमा आफुलाई सेवाग्राही भन्दै आएका श्यामबहादुर सापकोटाले महानिर्देशक काफ्लेको कार्यकक्ष प्रवेश गरी ८० लाख नेपालीलाई विदेशमा बिचल्लीमा पार्ने हो ? भन्दै गालीगलौज र अभद्र व्यवहार शुरू गरी हातपातको स्तरमा उत्रिन खोजेको विभाग स्रोतले जनाएको छ ।
महानिर्देशकको कार्यकक्षमा चर्काचर्की भएको आवाज आएपछि विभागमा रहेको प्रहरीले सापकोटालाई पक्राउ गरेको छ । सापकोटालाई कानूनी कारबाहीका लागि महानगरीय बृत नयाँ बानेश्वरको हिरासतमा राखेको विभाग स्रोतले जानकारी दियो ।
विभागका प्रवक्ता कमल ज्ञवालीले घटनाक्रम हेर्दा विभागमा गुनासो लिएर आएको नभई महानिर्देशकमाथि अभद्र व्यवहार गर्ने योजनावद्ध उद्देश्यसहित आएको देखिएको बताए ।
महानिर्देशक काफ्लेको कार्यकक्षमा प्रवेश गर्नुअघि सापकोटाले आफु एकीकृत राप्रपा नेपाल नुवाकोटको महामन्त्री भन्दै परिचय दिएका थिए । राजनीतिक दलको नेताको परिचय दिएपछि महानिर्देशक काफ्लेले सहजै भेटघाटको समय दिएको तर भेटघाट शुरू गरेको पाँच मिनेटमै सापकोटा आक्रमणको शैलीमा प्रस्तुत भएको बताइएको छ ।
जनकपुरमा खानेपानी तथा ढल व्यवस्थापन आयोजना जनकपुरधामका निमित्त प्रमुख राजेश कुशवाहामाथि सिके साउत नेतृत्वको जनमत पार्टीका कार्यकर्ताले गरेकोे शैली पछ्याउँदै आक्रमण प्रयास हुनु गम्भीर विषय भएको कर्मचारीहरूको भनाइ छ ।
वैदेशिक रोजगार व्यवसायीहरूले महानिर्देशक काफ्लेमाथि भएको दुर्व्यवहारको निन्दा र भत्र्सना गरेका छन् । नेपाल वैदेशिक रोजगार व्यवसायी संघका महासचिव सुजितकुमार श्रेष्ठले महानिर्देशकको कार्यकक्षमा प्रवेश गरी आक्रमणको प्रयास भएको घटनाप्रति संघको गम्भीर ध्यानाकर्षण भएको टिप्पणी गर्दै घटना निन्दनीय भएको बताए ।
कुनै पनि गुनासो वा उजुरी भए छलफलका माध्यमबाट समाधान गर्ने प्रणाली रहेको अवस्थामा त्यसको बेवास्ता गरी कानून हातमा लिने कार्यले विभागको सेवा प्रवाहमा अवरोध पुग्ने भन्दै महासचिव श्रेष्ठले घटनाको गहिरोसँग अनुसन्धान गरी दोषीलाई कानून अनुसार कडा कारबाही गरिनुपर्ने माग गरे । महासचिव श्रेष्ठले दोषीलाई कारबाही नभएमा कानून हातमा लिई जथाभावी गर्न चाहने अराजक पक्षले टाउको उठाई दण्डहीनताको शुरूवात हुने भन्दै त्यस्ता खतराप्रति सरकार गम्भीर हुनुपर्ने बताए ।
त्यस्तै नेपाल लोकतान्त्रिक वैदेशिक रोजगार व्यवसायी एसोसिएसनका अध्यक्ष नरेन्द्र प्रसाद ढकालले पनि वैदेशिक रोजगार व्यवसाय र व्यवसायीलाई बद्नाम गर्न खोजिरहेको तत्वले महानिर्देशक काफ्लेमाथि दुर्व्यवहार गरेको टिप्पणी गरे । अभद्र व्यवहारको छायांकन गर्ने र सामाजिक सञ्जालका सञ्चारमाध्यमबाट सस्तो लोकप्रियताका लागि प्रचार गर्नु अत्यन्तै आपत्तिजनक र निन्दनीय भन्दै अध्यक्ष ढकालले वैदेशिक रोजगार सम्वद्ध कार्यालयहरूमा पर्याप्त सुरक्षाको प्रत्याभुति गरिनुपर्ने माग गरे ।
सुरक्षाको प्रत्याभुति नभए कोरोना भाइरस संक्रमण पछि गति लिन थालेको वैदेशिक रोजगार क्षेत्रमा असुरक्षा उत्पन्न हुने खतरा रहेको समेत अध्यक्ष ढकालले बताए । यो समाचार मध्यान्ह दैनिकमा प्रकाशित छ
प्रतिक्रिया लेख्नुहोस्:-