यस्तो छ सुनील सेट्टीको नेपालमा सुटिङ र बसाइको सेड्युल

काठमाडौं । बलिउड अभिनेता सुनील सेट्टी आउँदो फेब्रुअरीको तेस्रो साता नेपाल आउने भएका छन् । नेपाली कथानक चलचित्र ‘एक्स–९’ को छायांकनका लागि उनी नेपाल आउन लागेका हुन् । उनी ६ दिन नेपालमा रहनेछन् ।

चलचित्रमा उनको छायांकनको सिन सुदूरपश्चिम प्रदेशका विभिन्न क्षेत्रमा रहेको छ । बडिमालिका, खप्तड, बैतडीको पाटन र कैलालीका विभिन्न क्षेत्रमा सेट्टीको छायांकन हुनेछ ।

“चलचित्रका मुख्य भूमिकामा रहने कलाकारमध्ये उहाँ पनि एक हो । बलिउडको ठूलो फिगर भएका कारण मात्रै उहाँलाई हामीले समावेश गरेका होइनौँ । कथाको डिमान्डले नै उहाँ समावेश हुनुभएको हो,” एक्स–९ का निर्देशक मुकुन्द भट्टले भने, “स्क्रिप्टमा काम गर्दा को कलाकार फिट हुन्छ भन्ने थियो । अप्सनमा अरू पनि धेरै कलाकार थिए । तर, उहाँले अफर स्वीकार गरेपछि हामीले अप्सनमा जानै परेन ।”

आफूले स्क्रिप्ट सुनाउँदा सुनीलले सुरुमै मन पराएको मुकुन्द सुनाउँछन् । “मैले स्क्रिप्ट पिच गर्दा नै उहाँले यस्तो चलचित्र नेपालमा पनि बन्छ ? भनेर भन्नुभयो,” मुकुन्द भन्छन्, “मेरो चलचित्र एलसी हेर्नुभएको रहेछ । एलसी–२ पनि हेरिसकेकाले उहाँले एलसी–२ को सटको प्रशंसा पनि गर्नुभयो । त्यसैले यो प्रयास र प्यासनका लागि प्रभावित भएको भन्दै तपाईंसँग काम गर्न तयार रहेको बताउनुभयो ।”

चलचित्रका लागि १२ करोड रुपैयाँ अनुमानित बजेट लाग्ने मुकुन्द बताउँछन् । यद्यपि, उनले सुनीललाई दिएको पारिश्रमिक भने खुलाउन चाहेनन् । उनको सुटिङ सक्न करिब १२ दिन लाग्नेछ । नेपालबाहेक स्कटल्यान्डमा पनि सुनीलले छायांकन गर्नेछन् । घुमघाम र आउन–जान गरेर करिब २० दिन लाग्ने उनी सुनाउँछन् ।

नेटफ्ल्क्सि, अमेजन अथवा हटस्टारलगायत डिजिटल प्लेटफर्ममा चलचित्र रिलिजका लागि आफूले बलिउडको ठूलो अनुहारलाई लिएर चलचित्र बनाउन लागेको उनी बताउँछन् । यसका लागि हलिउडबाट नायिका लिने तयारी गरिरहेको उनले जानकारी दिए । वेब सिरिजमा काम गरिरहेकी नायिकासँग अनुबन्धका लागि तयारी भइरहेको उनको भनाइ छ ।

“यो सबै गर्नुका पछाडि हाम्रो मुख्य उद्देश्य नेपाली चलचित्रलाई इन्टरनेसनल बजारमा लैजाने हो । बलिउड र हलिउडका ठूला फिगरलाई लिइयो भने विश्वभरका दर्शकको पहुँचमा रहेका डिजिटल प्लेटफर्ममा जान सहज हुन्छ भन्ने पनि हो,” निर्देशक मुकुन्द भन्छन्, “अब पनि हामीले अन्तर्राष्ट्रिय बजारमा जान सकेनौँ भने ढिलो हुन्छ । कम्तीमा विदेशी बजारको ढोका खोल्यौँ भने यसपछिलाई सहज हुन्छ भन्ने हाम्रो उद्देश्य हो । यदि, हामी यो चलचित्रमा सफल भयौँ भने नेपाली चलचित्रले बजारका लागि फेरि पछि फर्किएर हेर्नु पर्दैन ।”

‘एक्स–९’ फेब्रुअरीबाट छायांकन हुनेछ । छायांकनका लागि अहिलेबाटै वर्कसप सुरु भइसकेको छ । एक्सन, जिम, एक्टिङको वर्कसपमा निर्माण युनिट जुटिसकेको छ ।

सुनीलको नेपाल आगमनलाई पर्यटनसँग पनि जोड्ने प्रयास गरिरहेको निर्देशक मुकुन्द बताउँछन् । संस्कृति, पर्यटन तथा नागरिक उड्ययन मन्त्रालय र नेपाल पर्यटन बोर्डसँग सहकार्य गर्ने प्रस्तावको योजना बनिरहेको उनको भनाइ छ । “पर्यटन व्यवसाय सुस्ताइरहेको यो समयमा सुनीलको नेपाल भ्रमणलाई पर्यटनसँग पनि जोडेर हेर्न सकिन्छ । सगरमाथाको बेसक्याम्प, लुम्बिनी, जनकपुरजस्ता ठाउँमा घुमाउन सकियो भने भारतसहित विश्वका धेरै देशमा सकारात्मक सन्देश जान्छ । त्यसैले यसका लागि सरकारले सहयोग गरोस् भन्ने हाम्रो मनसाय हो । तर, यो प्रस्ताव हामीले गरिसकेका छैनौँ ।”

‘एक्स–९’ आउँदो वर्षको दसैँमा रिलिज गर्ने मुकुन्द बताउँछन् ।