काठमाडौं : छैटौं श्रममन्त्रीस्तरीय ‘आबुधाबी डायलग’को बैठकले आप्रवासी कामदारको सीप र सुरक्षामाथि विशेष जोड दिन आग्रह गरेको छ । संयुक्त अरब इमिरेट्स (यूएई) मा सोमबारदेखि आयोजित छैटौं श्रममन्त्रीस्तरीय ‘आबुधाबी डायलग’को बैठकले बुधबार साँझ आबुधावी घोषणापत्र जारी गरेको छ ।
घोषणापत्रमा वैधानिक कामदारको सीप विकास र सामाजिक सुरक्षा, रोजगारको पहिचान र सुरक्षा तथा आप्रवासी कामदार प्रशासनका लागि डिजिटाइजेशनमा जोड दिएको छ ।
मन्त्रीस्तरीय बैठकले आबुधावी डायलगको अध्यक्षता पाकिस्तानलाई हस्तान्तरण गरेको छ । पाकिस्तानलाई आबुधाबी डायलगको अध्यक्षताका लागि नेपालले विशेष आग्रह गरेकोे थियो । अध्यक्षता ग्रहण गर्दै पाकिस्तानका उद्योगमन्त्री मखदम खुश्रो बख्तयारले नेपालप्रति विशेष आभार जनाए ।
आबुधाबी डायलगको मन्त्रीस्तरीय औपचारिक कार्यक्रम बुधबार साँझ सकिएपनि बिहीबार आयोजक यूएईले अतिथिहरूलाई दिनभर नै एक्स्पो २०२० भ्रमण गराउने छ ।
बैठकलाई श्रम, रोजगार तथा सामाजिक सुरक्षामन्त्री कृष्णकुमार श्रेष्ठले सम्बोधन गरेका छन् । कोरोना भाइरस महामारीका कारण रोजगारी गुमाएर स्वदेश फर्किएका कामदारको सामाजिक र आर्थिक जीवनलाई सुधार गर्न गन्तव्य देशले आर्थिक तथा प्राविधिक सहयोग गर्नुपर्नेमा मन्त्री श्रेष्ठले जोड दिएका छन् ।
त्यसैगरी मन्त्री श्रेष्ठले न्युनतम पारिश्रमिक बढाउनुका साथै निःशुल्क खान बस्न व्यवस्था गर्नुपर्ने, आप्रवासी श्रमिकको कार्यस्थल सुरक्षालाई सुनिश्चित गर्नुपर्ने, विज्ञान र प्रविधिमा आएको नवीनता अनुसार कामदारको सीप र क्षमता विकासका कार्यक्रम गर्नुपर्ने, आप्रवासी कामदारको कोरोना परीक्षण निःशुल्क गर्नेपर्ने, क्वारेन्टिन तथा आइसोलेसन सेन्टरमा कुनै शुल्क नलिने व्यवस्था गर्न प्रस्ताव गरेका छन् ।
आबुधाबी डायलगमा नेपालबाट मन्त्री श्रेष्ठको नेतृत्वमा मन्त्रालयका सचिव सूर्यप्रसाद गौतम र उपसचिव थानेश्वर भुसाल सहभागी छन् ।
प्रतिक्रिया लेख्नुहोस्:-