काठमाडौं : वैदेशिक रोजगारीमा गएका कामदारको सम्मानजनक स्वदेश दीगो पुनःएकीकरणमा जोड दिँदै स्वदेश फिर्ता आप्रवासी कामदाहरूको सम्मेलन सम्पन्न भएको छ । स्वदेश फिर्ता भएका श्रमिकको पुनःएकीकरणलाई कसरी प्रभावकारी बनाउन सकिन्छ भन्ने विषयलाई मध्यनजर गर्दै सुरक्षित आप्रवासनका लागि राष्ट्रिय सञ्जालले काठमाडौंमा दुईदिने सम्मेलन आयोजना गरेको थियो ।
सम्मेलनले वैदेशिक रोजगारबाट फर्केका श्रमिकहरूका आवाज सुन्ने, पुनःएकीकरणसम्बन्धी हाल भइरहेका कार्यक्रमहरूका बारेमा जानकारी आदान प्रदान गर्ने, पुनःएकीकरणमा देखिएका समस्या पहिचान गर्ने र समाधानका लागि सम्बन्धित निकाय एवं सरोकारवालालाई सझाव प्रस्तुत गर्दै १९ बुँदे काठमाडौं घोषणापत्र जारी गरेको छ ।
घोषणापत्रमा पुनःएकीकरणसम्बन्धी नीति तथा सम्बन्धित ऐन, कानुन तथा निर्देशिकालगायतका नीतिगत तथा संरचनागत व्यवस्था शीघ्र निर्माण गरिनुपर्ने, नीति तथा कार्यक्रमहरू तीन तहको संयन्त्रअनुरूप कार्यान्वयन गरिनुपर्ने, पुनःएकीकरणका क्रियाकलापमा स्थानीय तहको सक्रियता बढाउनुपर्ने पक्षमा जोड दिएको छ ।
त्यसैगरी सम्मेलनले विदेशबाट फर्केका श्रमिकको सीप परीक्षण तथा प्रमाणीकरणको व्यवस्था गरी प्राप्त ज्ञान, सीप तथा अनुभवको भरपुर सदुपयोग हने गरी काम र सेवा सुविधा उपलब्ध गराइनुपर्ने, भारतलगायत विदेशबाट फर्केका श्रमिकको खण्डिकृत तथ्यांक राखिनुपर्नेमा जोड दिएको छ ।
पुनःएकीकरणका विषयलाई गन्तव्य मुलुकसँग गरिने द्विपक्षीय सम्झौता र समझदारीपत्रमा समावेश गर्न पहल गर्नुपर्ने, पुनःएकीकरणसँग सम्बन्धित वा पुनःएकीकरणमा सघाउ पुग्ने गरी सञ्चालित सेवा सुविधा तथा कार्यक्रमहरूका विषयमा व्यापक प्रचार प्रसार गर्नुपर्ने सुझाव पनि सम्मेलनको छ ।
जिम्मेवार निकायको क्षमता अभिवृद्धि गरिनुपर्ने, पुनःएकीकरणका सम्बन्धमा गन्तव्य मुलुकको दायित्व किटान गरिनुपर्ने, वैदेशिक रोजगारीमा गएका व्यक्ति तथा तिनका परिवारलाई सामाजिक सुरक्षाका कार्यक्रमहरूमा समावेश गरिनुपर्ने, पुनःएकीकरणका कार्यक्रमहरू व्यक्तिको सीप एवं दक्षता, आवश्यकता र रुची, स्थानीय परिवेश र प्राथमिकतामा आधारित हुनुपर्ने लगायतका सुझाव घोषणापत्रमा छन् ।
सरकारले स्वदेश फर्केका श्रमिकका लागि प्रदान गरेका सेवा तथा कार्यक्रमका बारेमा अधिकांशलाई जानकारी नभएका कारणले पुनःएकीकरणका कार्यक्रमहरू प्रभावकारी हुन नसकेको निष्कर्ष निकाल्दै सम्मेलनले विदेशबाट फर्केका श्रमिकलाई कामकै लागि पुनः विदेश जानुपर्ने बाध्यात्मक अवस्थाबाट मुक्त गर्न सकिने बताएको छ । सम्मेलनमा समापन मन्तव्य राख्दै युवा तथा खेलकुद मन्त्री महेश्वरजंग गहतराजले रोजगार नभई स्वरोजगारमा केन्द्रित हुनुपर्ने सुझाव दिए ।
प्रतिक्रिया लेख्नुहोस्:-