काठमाडौं : श्रम, रोजगार तथा सामाजिक सुरक्षामन्त्री कृष्णकुमार (किसान) श्रेष्ठले पूर्ण क्षमताका साथ काम गरेर परिणाम देखाउन कर्मचारीलाई निर्देशन दिएका छन् । मन्त्रालयमा मंगलबार आयोजित वार्षिक समीक्षा कार्यक्रममलाई सम्बोधन गर्दै मन्त्री श्रेष्ठले मन्त्रालयका कर्मचारीले पूर्ण क्षमतामा काम गरेर परिणाम ल्याउनु पर्ने बताए ।
सोमबार मन्त्रीको पद वहालीको एक महिना पूरा गरेका मन्त्री श्रेष्ठले यस अवधिमा महत्वपूर्ण चाडपर्व परेका कारणले पुरै अवधि काम गर्न नपाएको भएपनि अब एक सयको गतिमा दौडिन आवश्यक रहेको उल्लेख गरे ।
उनले यसबीचमा पोखरा, बुटवल र हेटौंडामा रहेका श्रम कार्यालयको स्थलगत भ्रमण गरेका थिए । उक्त प्रसंग उल्लेख गर्दै मन्त्री श्रेष्ठले भने, ‘बुटवलमा भयानक सरकारी भवन रहेछ, तर कार्यालय भाडाको घरमा बसेको छ, हेटौंडाबाट श्रम स्वीकृति शुरू नगर्दा वैदेशिक रोजगारमा जाने कामदार श्रम स्वीकृतिका लागि काठमाडौंसम्म धाउनुपर्ने पर्ने अवस्था देखिन्छ, यसमा तत्काल सुधार हुनुपर्छ ।’
मन्त्री श्रेष्ठले कर्मचारीको अभाव देखाएर सेवाग्राहीलाई दुःख दिन नहुने भन्दै आवश्यकता अनुसार पूर्वाधार र कर्मचारीको व्यवस्थापन गर्न समेत निर्देशन दिएको मन्त्री श्रेष्ठको निजी सचिवालयले जनाएको छ । यो समाचार मध्यान्ह दैनिकले छापेको छ ।
प्रतिक्रिया लेख्नुहोस्:-