काठमाडौं । लुकास पाक्वेटाको गोलमा बाज्रिलले शुक्रबार बिहान विश्वकप छनोट प्रतियोगितामा कोलम्बियालाई १–० ले हराएको छ । यससँगै ब्राजिलले अर्को वर्ष कतारमा हुने फिफा विश्वकपमा स्थान पक्का गरेको छ ।
ब्राजिलको जितमा पाक्वेटाले ७२औं मिनेटमा गरेको गोल निर्णायक बनेको थियो । लियोनका मिडफिल्डर पाक्वेटाले नेइमारको पासलाई पोष्टको दिशा दिएका हुन् ।
जितसँगै ब्राजिलले कतार विश्वकपमा स्थान पक्का गरेको हो । यसअघि आयोजक कतार तथा युरोपबाट जर्मनी र डेनमार्कले पनि अर्को वर्ष हुने विश्वकपमा स्थान बनाएका थिए ।
विश्वकप छनोट प्रतियोगितामा अपराजित यात्रालाई कायमै राखेको छ । ब्राजिलले १२ मध्ये एक बराबरी ११ खेल जित्दै ३४ अंक जोडेको छ । जुन पाँचौं स्थानको कोलम्बियाभन्दा १८ अंकले माथि हो । दक्षिण अमेरिकी छनोट प्रतियोगिताबाट शीर्ष चारले सिधै विश्वकपमा स्थान बनाउने छ भने पाँचौं स्थानको प्लेअफ खेल्नेछ । कोलम्बियाले अब पाँच खेल खेल्न बाँकी छ ।
दक्षिण अमेरिकी विश्वकप छनोट प्रतियोगितामा ब्राजिल शीर्ष स्थानमा छ । जुन दोस्रो स्थानको अर्जेन्टिनाभन्दा ९ अंकले अगाडि हो । तथापी अर्जेन्टिनाले एक खेल कम खेलेको छ । अर्जेन्टिनाले शनिबार बिहान उरुग्वेविरुद्ध खेल्नेछ । ब्रजिलले अब बुधबार बिहान अर्जेन्टिनाविरुद्ध खेल्नेछ भने कोलम्बियाले पाराग्वेविरुद्ध खेल्नेछ ।
आजै दक्षिण अमेरिकी छनोट प्रतियोगितामा चिलीले पाराग्वेलाई १–० ले हरायो । त्यस्तै इक्वेडरले भेनेजुएलालई पनि १–० ले हरायो । जितसँगै चिलीले १३ खेलबाट १६ अंक जोडेको छ । चिली चौथो स्थानमा छ । समान खेलबाट २० अंक जोडेको इक्वेडर तेस्रो स्थानमा छ ।
पराजित पाराग्वे १२ अंकका साथ आठौं स्थानमा छ । भेनेजुएला सात अंकका साथ पुछारमा छ ।
प्रतिक्रिया लेख्नुहोस्:-