काठमाडौं : श्रम, रोजगार तथा सामाजिक सुरक्षा मन्त्रालयका सचिव सुर्य प्रसाद गौतमको सरूवा भएको छ । सरकारले सोमबार गरेकोे १० जना सचिवको सरुवामा सचिव गौतम पनि परेका छन् । गौतमलाई प्रधानमन्त्री तथा मन्त्रिपरिषद्को कार्यालयमा पठाइएको छ ।
उनको स्थानमा संघीय मामिला तथा सामान्य प्रशासन मन्त्रालयका सचिव एक नारायण अर्याललाई ल्याइएको छ । सरुवा भएका सचिवहरुले मंगलबार मात्रै सरुवा पत्र बुझ्ने बताइएको छ ।
सचिव गौतमले गत फागुन ६ गते श्रम मन्त्रालय आएका थिए । मन्त्रालयका तत्कालीन सचिव तोयम रायालाई सरकारले अख्तियार दुरुपयोग अनुसन्धान आयोगमा सरुवा गरी सचिव गौतमलाई श्रम मन्त्रालयमा सरुवा गरेको हो ।
विभिन्न स्थानीय तह, शैक्षिक जनशक्ति विकास केन्द्र, संघीय मामिला तथा सामान्य प्रशासन मन्त्रालयमा रहेर कार्य गरिसेका सचिव गौतम श्रम, रोजगार तथा वैदेशिक रोजगार क्षेत्रमा नयाँ मानिएका भए पनि उनको कार्यकालमा व्यवसायीको टाउको दुखाइको विषय बनेको संख्या सयको समस्या समाधानमा सक्रियता देखाएका थिए ।
पछिल्ला दिनमा उनले व्यवसायीको अर्को टाउको दुखाइको विषय रहेको फ्रि भिसा फ्रि टिकटको निर्णय परिवर्तन गरी व्यवसायीले कामदारले पाउने एक महिनाको तलब बराबर सेवा शुल्क लिन पाउने व्यवस्था गरिनुपर्ने अडान राखेका थिए ।
प्रतिक्रिया लेख्नुहोस्:-