काठमाडौं– नेपालीहरूको प्रमुख रोजगार गन्तव्य मुलुक साउदी अरबमा कोरोना भाइरसको नयाँ भेरियन्ट ‘ओमिक्रोन’ देखिएको छ । साउदीको सरकारी न्युज एजेन्सीका अनुसार उत्तरी अफ्रिकी देशबाट आएका साउदी नागरिकमा ‘ओमिक्रोन’ संक्रमण देखिएको हो ।
डरलाग्दो भेरियन्ट पत्ता लागेपछि स्थानीय अधिकारीले संक्रमित, उनको परिवार र उनको सम्पर्कमा आएका व्यक्तिलाई क्वारेन्टाइनमा राखेको समाचारमा जनाइएको छ । खाडी मुलुकमा ‘ओमिक्रोन’ भेटिएको यो पहिलो घटना हो । यसैबीच, नेपालीको रोजगार गन्तव्य मुलुक दक्षिण कोरियामा पनि कोरोनाको नयाँ भेरियन्ट ‘ओमिक्रोन’ फेला परेको छ । कोरिया रोग नियन्त्रण तथा रोकथाम एजेन्सी (केडिसिए) का अनुसार हालै नाइजेरियाबाट फर्किए एक दम्पत्तीमा ओमिक्रोन देखिएको हो । कोरोनाविरुद्धको खोपको दुवै मात्रा लगाएका ती दम्पत्ती नोभेम्बर १४ देखि २३ तारिखसम्म नाइजेरिया भ्रमणमा गएको बताइएको छ ।
उनीहरू कोरिया प्रवेशपछि गरिएको परीक्षणमा ओमिक्रोन देखिएको त्यहाँका स्थानीय सञ्चार माध्यमले जनाएका छन् । कोरियाले शनिबारदेखि लागू हुने गरी दक्षिण अफ्रिकासहित बोत्स्वाना, जिम्बाबे, नामिबिया, लसोथो, मोजाम्विक, मालावीलगायत देशबाट हवाइ उडानसहित आवागमनमा अनिश्चितकालका लागि प्रतिबन्ध लगाइसकेको समाचारमा जनाइएको छ ।
प्रतिक्रिया लेख्नुहोस्:-