काठमाडौंः छिमेकी देश भारतमा पनि कोरोनाको नयाँ भेरियन्ट पुष्टि भएसँगै नेपालमा थप चुनौति देखिएको छ। भारतसँग नेपालका सीमाना खुला हुनुले पनि चुनौति थपिएको हो।
अहिले पनि भारतका उत्तरप्रदेश, विहार, सिक्किम, उत्तराखण्डलगायत राज्यहरुबाट नेपालमा आउजाउ हुने गरेका छन्। ओमिक्रोन संक्रमणको जोखिम बढिरहँदा ती क्षेत्रमा सरकारले कोरोना परीक्षण प्रभावकारी बनाउन सकेको छैन, न आवतजावतमा नियमन नै गर्न सकेको छ।
भारतीय सञ्चारमाध्यमका अनुसार दुई जनामा ‘ओमिक्रोन’ भेरियन्ट फेला परेको हो। अफ्रिकी मुलुकमा पहिचान गरिएको ओमिक्रोन भेरिएन्ट (सार्स कोभ-२ भेरियएन्ट ओमिक्रोन) (बी.१.१.५२९) विश्वका अन्य मुलुकमा पनि तीव्ररुपमा फैलिरहेको छ।
कोरोनाको नयाँ भेरियन्ट देखिएसँगै स्वास्थ्य तथा जनसंख्या मन्त्रालय संक्रमण रोकथाममा लागिपरेको बताएको छ। मन्त्रालयका सहप्रवक्ता डा. समीरकुमार अधिकारीले विमानस्थलमा कडाइ गरिएको बताए। उनले भने, ‘४८ घण्टा अगाडि पीसीआर परीक्षण गरेको छैन भने उसलाई नेपाल प्रवेशमा रोक लगाइएको छ। कोही व्यक्तिले पूर्ण भ्याक्सिन लगाएको छैन भने आइसोलेसनमा बस्नुपर्ने हुन्छ।’
सरकारले सकेसम्म विदेश यात्रा नगर्न अपीलसमेत गरिसकेको छ। विश्व स्वास्थ्य संगठनले यो भेरियन्टलाई विश्वव्यापी भेरियन्ट अफ कन्सर्न भनी घोषणा गरेको छ।
सरुवा रोग विशेषज्ञ डा. शेरबहादुर पुनले ओमिक्रोन भेरियन्टलाई नेपाल भित्रिन नदिन त्रिभुवन अन्तर्राष्ट्रिय विमानस्थलको साथै नेपाल-भारत सीमानामा कडाई गर्नुपर्ने बताए ‘परीक्षणलाई चुस्तता दिनुपर्छ। कसैलाई संक्रमण देखिए आइसोलेसन व्यवस्थापनमा जोड दिनुपर्छ। विगतमा देखिएका कमीकमजोरीको समीक्षा गरी सुधार गर्नुपर्ने हुन्छ,’ उनले भने।
प्रतिक्रिया लेख्नुहोस्:-