कतारमा रहेका अवैधानिक कामदारलाई वैध हुने बाटो खुल्यो, दूतावास र एनआरएन कतारले सचेतना कार्यक्रम गर्दै

दोहा, कतार : कतारमा विभिन्न कारणले अवैधानिकरूपमा कार्यरत कामदारहरूलाई यहाँको सरकारले वैधानिक हुन बाटो खुला गरेको छ l आप्रवासी कामदारहरूको आगमन, प्रस्थान र नियमन गर्न बनेको सन् २०१५ को कानून नं १५ को उल्लंघन गरी गैरकानूनीरूपमा कतारमा बसेका कामदारहरूले आधा जरिवाना शुल्क तिरेर आफूले चाहेको कम्पनीमा वैधानिक हुन सकिने यहाँको आन्तरिक मन्त्रालयले जनाएको छ l

आफ्ना कामदारहरूको कतारी आइडी नलगाएका कम्पनीले पनि उक्त कानूनको प्रयोग गरी कामदारलाई वैध बनाउन सक्ने मन्त्रालयले जनाएको छ l गएको अक्टोबर १० देखि खुला भएको यस आममाफी तथा वैध हुने प्रक्रियाको अन्तिम म्याद यही डिसेम्बर ३१ सम्म रहेको छ l

यसैबीच उक्त कानून तथा नीतिलाई सम्पूर्ण नेपाली श्रमिकहरूसमक्ष पुर्‍याउन नेपाली दूतावास कतार र एनआरएनए कतारले सचेतनामूलक कार्यक्रमको आयोजना गर्न लागेको दूतावासले सूचना मार्फत जनाएको छ l

यही डिसेम्बर १० तारिख शुक्रबार भर्चुअल माध्यमबाट नेपालीहरू लक्षित सचेतना कार्यक्रम गर्न लागिएको गैर आवासीय नेपाली संघ (एनआरएनए) कतारका अध्यक्ष मोहम्मद मुक्तदा मुसलमानले मध्यान्हलाई जानकारी गराए ।

कतारमा अवैध रूपमा बसोबास गर्ने सम्पूर्ण नेपालीहरूलाई सहभागी हुन, सरकारले प्रदान गरेको सुविधाको उपयोग गर्न र सबैलाई सुसूचित गर्न कार्यक्रममा सबै जोडिन एनआरएनए कतारका महासचिव पदम गिरीले अनुरोध गरेका छन् l कार्यक्रम मध्यान्ह साढे १२ बजेबाट शुरु हुनेछ भने नेपाली दूतावास कतारको अफिसियल फेसबुक पेजबाट लाइभ हुने दूतावासले जनाएको छ l