काठमाडौं– वैदेशिक रोजगार व्यवसायीको छाता संगठन नेपाल वैदेशिक रोजगार व्यवसायी संघको चुनाव आगामी २३ पुसमा हुने भएको छ । कोरोना महामारीका कारण केही ढिलाइ भएको संघको चुनावसहितको साधारण सभा २३ पुसमा गर्ने गरी तयारी भएको संघका द्वितीय उपाध्यक्ष कमलदेव मल्लले बताए ।
मल्लका अनुसार मंगलबार बसेको संघको कार्यसमितिको बैठकले चुनावको तयारी स्वरूप निर्वाचन समिति निर्माण गरेको छ । निर्वाचन समिति संघका सल्लाहकार रविन्द्र शेरचनको संयोजकत्वमा निर्माण गरिएको छ । त्यस्तै पदेन सदस्य सचिवका रूपमा संघका कानुनी सल्लाकार शम्भु निरौलालाई चयन गरिएको र एक जना सदस्य प्रगतिशिल व्यवसायी संघका तर्फबाट नाम आउन बाँकी रहेको मल्लले बताएका छन् । ‘प्रगतिशीलको तर्फबाट नाम आएपछि निर्वाचन समितिले पूर्णता पाउँछ, उहाँहरूले भोलिसम्म नाम दिने बताउनु भएको छ,’ मल्लले भने ।
भदौ महिनामा हुनुपर्ने चुनाव कोरोना भाइरस (कोभिड–१९) का कारण समय मै निर्वाचन हुन सकेको थिएन । संघको निर्वाचन मिति यसअघि नै तोकिएको भए पनि बुधबारदेखि चुनावको माहोल सुरु भएको द्वितीय उपाध्यक्ष मल्लले बताएका छन् । अहिले कोभिडको संक्रमण पनि सामान्य बन्दै गएको अवस्थामा संघको चुनाव हुने निश्चित भएको उनले बताए । ‘अब पूर्ण रूपमा संघमा चुनावी माहोल सुरु भएको छ, चुनावसहितको साधारण सभाबाट दुई वर्षका लागि नयाँ नेतृत्वसमेत चयन गर्नेछ,’ मल्लले भने । कोभिडका कारण संघका अध्यक्ष विष्णुप्रसाद गैरेको निधन भएपछि अहिले संघ कार्यवाहक अध्यक्ष कमल तामाङको नेतृत्वमा रहेको छ ।
प्रतिक्रिया लेख्नुहोस्:-