यूएई : युनाइटेड अरब इमिरेट्स (यूएई)ले परिवर्तित साप्ताहिक बिदा कार्यान्वयनका लागि निजी क्षेत्रलाई आह्वान गरेको छ । यूएई सरकारले शुक्रबारदेखि आइतबारसम्म लागू हुने गरी हप्ताको साढे चार दिन मात्र काम गर्ने निर्णय मंगलबार सार्वजनिक गरेको थियो ।
विश्वका अन्य देशमा हप्ताको ६ दिन दैनिक ८ घण्टा काम गर्नु परेको अवस्थामा यूएईले विश्वमै पहिलो पटक साढे चार दिनको कार्य हप्ता तोकेको निर्णय सार्वजनिक गरेकोे हो । सार्वजनिक बिदाको नयाँ निर्णयले काम र जीवनको तालमेलमा सन्तुलन मिलाउने र उत्पादत्वमा वृद्धि गर्ने सरकारी अधिकारीहरूलाई उद्धृत गर्दै स्थानीय समाचारपत्रहरूले टिप्पणी गरेका छन् ।
नयाँ निर्णय अनुसार अब शुक्रबार आधा दिनपछि शनिवार र आइतबार बिदा दिएर साढे चार दिनको कार्य हप्ता हुने गल्फ न्यूजले जनाएको छ । नयाँ निर्णय आगामी जनवरी पहिलो तारेखदेखि कार्यान्वयनमा आउने बताइएको छ । त्यसका लागि यूएईको निजी क्षेत्रले तीन हप्ताको तयारी समय पाएको छ ।
यूएईमा आगामी फेब्रुअरीमा श्रम कानूनमा पनि केही परिवर्तन गर्ने तयारी छ । त्यसअघि नै सार्वजनिक साप्ताहिक कार्य समय परिवर्तनले परिवर्तन हुन लागेका श्रम कानून कार्यान्वयनमा सहजता आउने बताइएको छ । साढे चार दिनको कार्य हप्ता हुने भएपछि त्यसबाट नेपालबाट वैदेशिक रोजगारीमा जानेसहित आप्रवासी कामदारहरूलाई राहत मिल्ने बताइएको छ ।
प्रतिक्रिया लेख्नुहोस्:-