मलेसियाबाट ‘केही दिनमै घर आउँछु’ भनेका थिए, सवारी दुर्घटनामा परेर बिते!

वैदेशिक रोजगारीका लागि मलेसियाको जोहार बरुमा रहेका कञ्चनपुरकाे शुक्लाफाँटा नगरपालिका–१२ दुवाहाका अन्दाजी २५ वर्षीय राजेन्द्रबहादुर चौधरीको सडक दुर्घटनामा परी मृत्यु भएको छ।

नौ दिनअघि मोटरसाइकलमा जाँदै गरेका चौधरीको दुर्घटनामा परेर मृत्यु भएको हो। मृतकको शव जोहारको अस्पतालमा राखिएको छ।

चौधरी मलेसियाको मेट्रोनिक इन्डस्ट्रिज एसडिएम डिएसडी जोहार बरुमा ६ वर्षदेखि कार्यरत थिए। उनी अविवाहित थिए।

‘काकाको छोरोका विवाहका लागि केही दिनमै घर आउँदै छु। केही सामानसमेत खरिद गरेको छु भनेर मलेसियाबाट राजेन्द्रले फोनमा कुरा गरेको थियो’, मृतकका छिमेकी बुद्धिराम चौधरीले भने, ‘फोनमा कुरा भएको केही दिनमै मृत्युको खबर सुनेका छौँ।’

मृत्युको खबर सुनेपछि पूरै परिवार र छिमेकी शोकमग्न भएको उनले बताए। मृतकको शव नेपाल ल्याउन मलेसिया काममा पठाउने दिपप्रोटेड मेनपावर कम्पनी, श्रमविभाग र राजदूतावासमा पहल भइरहेको चौधरीले बताए। रासस