अमेरिकी विधायकका लागि नेपाली मुलका ह्यारी भण्डारीले गराए उम्मेदवारी दर्ता गराएका छन् । एक विज्ञप्तिमार्फत उनले मेरिल्याण्ड डिस्ट्रिक्ट ८ को डेलिगेट पदमा दोस्रो कार्यकालका लागि औपचारिक रूपमा उम्मेदवारी दर्ता गराएको जानकारी दिएका छन् ।
पश्चिम नेपालको पर्वत थापा थानामा जन्मेर अमेरिकी राजनीतिमा संघर्षरत उनले नेपाली समुदायलाई अमेरिकाको मूलधारसँग जोड्न आफूले पहल गर्ने बताएका छन् । ‘हाम्रा समस्यालाई अमेरिकी साझा समस्या बनाउनुपर्छ। त्यसो गर्न सकियो भने मात्र हामी भिजिबल हुन्छौ र हाम्रा समस्याहरू समाधानको दिशामा अगाडि बढ्छन्। अमेरिका हामी र हाम्रा सन्ततिका लागि प्रचुर अवसर रहेको देशका रूपमा उपस्थित हुन्छ’, उनले उम्मेदवारी दर्ता गराएपछि भनेका छन् ।
आज फर्केर हेर्दा अमेरिकामा रहेका नेपाली समूदायको साझा सपना केही मात्रामा भए पनि साकार हुने दिशामा अगाडि बढिरहेको उनले बताएका छन् । ‘छोटो समयमा जुनसुकै क्षेत्रमा रहेर पनि हाम्रो समुदायले जुन उपलव्धी हासिल गरेको छ, त्यो आफैंमा एक मानकको रूपमा उभिएको छ’, विज्ञप्तिमा भनिएको छ ।
उनले अगाडि भनेका छन्, ‘विधायकका लागि उम्मेदवारी दिइरहेको बेला अमेरिकाकै सबैभन्दा पुरानो स्टेट क्यापिटल हलमा जारी ४४४ औं संसदीय सत्रमा म मेरो पहिलो कार्यकालको अन्तिम सत्रमा विधायिकी कार्यहरू सम्पन्न गरिरहेको छु। जहाँबाट जेफरसन र वासिङट्नले आजको विशाल अमेरिका बनाउन देखेका सपनाहरूमा हामी र हाम्रा सन्ततिका सपनाहरू तरङ्गित भैरहेको अनुभव हुन्छ। त्यसबाट हासिल भएका अनुभव र आत्मबल हाम्रा समुदायका सार्वजनिक पूँजी हुन्।
अहिले अमेरिकाभरि नै हाम्रो समुदायका होनहारहरू केही सार्वजनिक पदमा रहेर र केही त्यसका लागि प्रयासरत रहेर नेपाली समुदायको सामाजिक आर्थिक स्थिति मजबुत बनाइरहनुभएको छ। म उहाँहरू सबैको सफलता र प्रयासको हृदयदेखि नै प्रशंसा गर्न चाहान्छु। र, सहकार्यका लागि सदैव तयार रहेको प्रतिवद्धता व्यक्त गर्दछु।’
आफ्नो उम्मेदवारी अहिलेका लागि डेमोक्रेटिक पार्टीको आधिकारिक उम्मेदवारी जित्ने आकांक्षाको लागि भएको उनको भनाइ छ । जुन २८ मा हुने डेमोक्रेटिक प्राइमरीमा विजयी भएपछि मात्र नोभेम्बर ८ मा हुने चुनावका लागि डेमोक्रेटिक उम्मेदवार हुने आफ्नो ढोका खुल्ने उनको भनाइ छ ।
प्रतिक्रिया लेख्नुहोस्:-