काठमाडौँ — चीनले शुक्रबारदेखि तिब्बतमा बुलेट ट्रेन सञ्चालनमा ल्याएको छ । महत्त्वपूर्ण परियोजनाका रुपमा रुपमा रहेको उक्त रेल तिब्बतको राजधानी ल्हासा र निङ्ची सहरबीच चल्ने चिनियाँ सरकारी समाचार संस्था सिन्ह्वाले जनाएको छ ।
कुल ४३५.५ किलोमिटर लामो रेलमार्ग सिचुआन–तिब्बत रेल्वेमातहत सञ्चालनमा ल्याइएको हो । चिनियाँ कम्युनिस्ट पार्टीले जुलाई १ मा आफ्नो स्थापनाको १००औं वर्षगाँठ मनाउन लागेका बेलामा तिब्बतमा बुलेट रेल सञ्चालन गर्नुलाई महत्त्वपूर्ण उपलब्धिका रुपमा हेरिएको छ ।
उक्त विद्युतीय रेल १६० किलोमिटर प्रतिघण्टाको गतिमा गुड्ने पनि सिन्ह्वाले जनाएको छ । निङची तिब्बतको प्रमुख पर्यटकीय गन्तव्य हो । रेलमार्गको ९० प्रतिशत हिस्सा समुद्री सतहदेखि ३ हजार मिटरको उचाइमा रहेको सीजीटीएनले जनाएको छ । सबैभन्दा बढी ५१०० मिटरसम्मको उचाइमा रेलमार्ग रहेको छ । रेलमा अक्सिजनको पनि व्यवस्था गरिएको छ । ल्हासादेखि निङ्चीसम्म विभिन्न स्थानमा गरी ९ ठाउँमा रेल्वे स्टेसन रहेका छन् ।
गत नोभेम्बरमा चिनियाँ राष्ट्रपति सी चिनफिङले तिब्बतमा नयाँ रेल योजनाका बारेमा निर्देशन दिएका थिए । नयाँ रेलमार्गले तिब्बतको अर्थतन्त्र उकास्न सहयोग पुग्ने बताइएको छ ।
तस्बिरहरू : सिन्ह्वा र सीजीटीएन-कान्तिपुर
प्रतिक्रिया लेख्नुहोस्:-