अर्जेन्टिनामा सङ्क्रमण बढ्यो

काठमाडौं, असार १३ गते । अर्जेन्टिनामा गएको चौबीस घण्टामा १८ हजार ५५ जना कोरोना भाइरसका सङ्क्रमित थपिएका छन् । हालसम्म ४३ लाख ९३ हजार १४२ जना सङ्क्रमित भएका छन् ।
समाचार संस्था एएनआईका अनुसार गएको चौबीस घण्टामा अर्जेन्टिनामा ३३८ जना सङ्क्रमितको मृत्यु भएको छ । हालसम्म कोरोना सङ्क्रमणबाट अर्जेन्टिनामा मृत्यु हुनेको सङ्ख्या ९२ हजार ३१७ पुगेको छ ।
कोरोना सङ्क्रमणबाट निको हुने चालीस लाख नाघेको छ । हाल दुई लाख ९० हजार ४७९ जना सक्रिय सङ्क्रमित छन् । अर्जेन्टिनाको स्वास्थ्य मन्त्रालयका अनुसार हाल छ हजार ९९८ जना बिरामी सघन उपचार कक्षमा उपचारार्थ छन् । देशभरि भर्ना क्षमताको ७० प्रतिशत बिरामीले अस्पतालको शैय्या भरिएका छन् ।
हालसम्म अर्जेन्टिनामा एक करोड ९६ लाख ब्यक्तिले कोभिड १९ विरुद्धको खोप लगाएका छन् । जसमध्ये एक करोड ५७ लाखले कम्तीमा कोभिड १९ बिरुद्धको दुईमध्ये एक डोज लिएका छन् । ३९ लाख ब्यक्तिले कोरोनाको दुबै डोज पूरा गरेका छन् ।-गोरखापत्र