काठमाडौं। डिजिटल कारोबार र चेकबाट कारोबार हुने अहिलेको जमानामा पनि एक कम्पनीले आफ्ना कर्मचारीलाई सिक्का पैसामा तलब भुक्तानी दिएको छ । यो घटना सार्वजनिक भएपछि स्थानीय प्रशासनले कम्पनीको व्यवासाय इजाजतपत्र नै रद्द गरिदिएको छ । फिलिपिन्सको भालेन्जुएला सहरमा रहेको कम्पनीले कर्मचारीलाई तलबको रुपमा ५ र १० सेन्टाभोका सिक्काहरुले भरिएको एउटा झोला दिएको थियो ।
यो घटना सार्वजनिक भएपछि स्थानीय प्रशासनको ध्यान यस विषयमा गयो र स्थानीय प्रशासनले कर्मचारीप्रति गरिएको यो क्रुर मजाकको लागि कम्पनीको व्यवसाय इजाजत पत्र रद्द गरिदियो । फिलिपिन्सका नागरिक रसेल मनोसालाई नेक्सग्रिन फ्याक्ट्रीले यसरी सिक्का पैसा तलबमा दिएपछि उनका भाइले सहरका अधिकारी र श्रमिक संघसँग सहयोग मागेका थिए । मनोसाका अनुसार उनले कम्पनीको अनुचित श्रम नियमबारे गुनासो गरेपछि कम्पनीले बदला लिन यस्तो गरेको थियो ।
सीबीएन न्यूजका अनुसार फेसबुकमा यो घटनाबारे पोस्ट भएपछि सहरका मेयर रेक्स ग्याचलियनले यसलाई ‘क्रुर र असामान्य’ बताएका थिए । मेयरले त्यतिबेलै यो मुद्दाको तहसम्म जाने र कानुनअनुसार कम्पनीविरुद्ध कारवाही गर्ने बताएका थिए । मेयर त्यसपछि पीडित व्यक्तिसँग भेटे । उनले कम्पनी र पीडित कर्मचारीलाई साथमै राखेर एउटा बैठक गरे ताकि समस्या सुल्झाउन सकियोस् ।
सीएनएन फिलिपिन्सका अनुसार १०० पेसोभन्दा माथिको भुक्तानीमा सेन्टाभो (नेपाली पैसा जस्तै) दरका सिक्का दिन पाइँदैन र १ हजार पेसोभन्दा धेरैको भुक्तानीमा १ पेसो र ५ पेसोका सिक्का पनि दिन पाइँदैन । यो कम्पनीले भने ती कर्मचारीलाई १ हजार ५६ पेसो सबै ५ र १० सेन्टाभो दरका सिक्काको रुपमा दिएको थियो । कम्पनीका मालिकले झुक्किएर यसरी कर्मचारीलाई भुक्तानी दिएको र आफूलाई यसको जानकारी नभएको सफाइ दिएका थिए तर मेयरले यसलाई मानेनन् ।
बैठकका क्रममा सोधपुछ गर्दा मेयरले कम्पनीले मनोसालाई न्यूनतम पारिश्रमिक, ओभरटाइम, रातको सिफ्ट र विदाको दिन काम गरेवापत दिनुपर्ने अतिरिक्त पारिश्रमिक ठिकसँग भुक्तानी नगरेको पाएका थिए । बैठकपछि मेयरले कम्पनीको व्यवसाय सञ्चालन इजाजत पत्र निलम्बन गर्ने आदेश जारी गरे ।-डिसी नेपाल
प्रतिक्रिया लेख्नुहोस्:-