काठमाडौं। उड्ने मोटरसाइकलको सफल परीक्षण गरिएको छ । दक्षिणी क्यालिफोर्नियामा यसको परीक्षण गरिएकोमा यसले पहिलो चरण पार गरेको छ र प्रि–अर्डरका लागि तयार भएको क्यालिफोर्निया न्यूज टाइम्सले जनाएको छ । जेटप्याक एभिएसनले बनाउने यो उड्ने मोटरसाइकलको नाम पी वन राखिएको छ । यसलाई स्पिडर नामबाट पनि प्रचार गरिएको छ ।
यो एयरबाइक भर्टिकल टेकअफ र ल्याण्डिङ गर्न सकिन्छ । कम्पनीले यो मोटरसाइकललाई हावामा १५ हजार फिटको उचाइसम्म लैजान सकिने बताएको छ । जेटप्याक एभिएसनका अनुसार स्पिडरका २ भेरिएन्ट लञ्च गरिनेछन् । एउटाको प्रयोग आम मानिसहरुले दैनिक जीवनमा गर्न सक्नेछन् । अर्कोको प्रयोग सैन्य वा राहत कार्यसँग सम्बन्धित अपरेशनको लागि गरिनेछ ।
कम्पनीले यो मोटरसाइकल पूर्ण रुपमा स्टेबलाइज हुने र पाइलट प्रशिक्षण कम मात्रै आवश्यक पर्ने बताएको छ । यसको गति अधिकतम २४१ किलोमिटर प्रतिघण्टासम्म हुनेछ । मिलिट्री एयरबाइक ३० मिनेटसम्म हावामा रहन सक्छ । बाइकको अर्को भेरिएन्ट १० देखि २० मिनेटसम्म हावामा रहन सक्छ । अहिले यो बाइकलाई जेट इन्जिन, डिजल वा मट्टितेलबाट पनि चलाउन सकिन्छ ।
कम्पनीका अनुसार यो बाइकको विषयमा यस्तो प्रविधिमा काम भइरहेको छ जसबाट पर्यावरणलाई हुने नोक्सानी कम गर्न सकियोस् । सीएनबीसीको रिपोर्टअनुसार जेटप्याक एभिएसनलाई टिम ड्रेपरले पनि समर्थन गरेका छन् । टिमले यसअघि एलन मस्कको कम्पनी टेस्ला र स्पेसएक्समा लगानी गरिसकेका छन् । कम्पनीले अहिले पी टु मोडलमा पनि काम गरिरहेको छ । जेटप्याक एभिएसनका सीइओ डेभिड मोम्यानका अनुसार यो मोटरसाइकलको मूल्य ३ लाख ८० हजार डलर (साढे ४ करोड रुपैयाँ) हुन सक्छ ।-डिसी नेपाल
प्रतिक्रिया लेख्नुहोस्:-