काठमाडौं। अमेरिकी राष्ट्रपति जो बाइडेनले शुक्रबार अबेर राती अफगानिस्तानको ताजा अवस्थाबारे देशलाई सम्बोधन गरेका छन् । यो ४ दिनमा उनको दोस्रो सम्बोधन थियो । सम्बोधनमा बाइडेनले अहिले विश्वको अगाडि ठूलो संकट आएको बताए । जुलाइदेखि अहिलेसम्म १८ हजारभन्दा धेरै र १४ अगष्टपछि मात्रै १३ हजार मानिसहरुलाई काबुलबाट निकालिएको उनले बताए ।
यो इतिहासकै सबैभन्दा ठूलो र कठिन एयरलिफ्ट अपरेशन भएको बताउँदै बाइडेनले तालिबानको लागि समेत त्यहाँको स्थिति राम्रो नभएको बताए । उनले अमेरिकाका सबै नागरिकलाई निकाल्दासम्म अमेरिकी सेना काबुलमा उपस्थित रहने उनले विश्वास दिलाए । बाइडेनले भने ‘हामीले २० वर्षसम्म अफगानिस्तानसँग काम गरेका छौं । अहिले पनि काबुलमा हाम्रा ६ हजार सैनिक छन् । यदि तालिबानले अमेरिकी सेनामाथि आक्रमण गर्यो भने यसलाई सहन गरिने छैन ।’ बाइडेनले अर्को हप्ता अफगानिस्तानबारे ठूलो फैसला लिइने बताए ।
अफगानिस्तानबाट अमेरिकी सेना फिर्ता बोलाएपछि बाइडेनले सोमबार–मंगलबारको रात पहिलो पटक देशलाई सम्बोधन गरेका थिए । त्यतिबेला उनले अफगानिस्तानमा अहिले बनेको स्थितिको लागि त्यहाँका राष्ट्रपति अशरफ गनी र त्यहाँको नेतृत्वलाई जिम्मेवार भनेका थिए । उनले भनेका थिए ‘म मान्छु कि तालिबान निकै छिटो हावी भए । अफगान नेतृत्वले निकै छिटो आत्मसमर्पण गरे । हामीले त्यहाँ अरबौं डलर खर्च गर्यौं । अफगान फोर्सलाई प्रशिक्षण दियौं । यति ठूलो फौन र हतियारले सुसज्जित मानिसहरुले कसरी हार माने ? यो सोच्नुपर्छ ।’
प्रतिक्रिया लेख्नुहोस्:-