नर्थ क्यारोलिना (अमेरिका), भदौ ७ गते । गैरआवासीय नेपाली सङ्घ (एनआरएन) अमेरिकाले कोभिड–१९ को महामारीविरुद्ध नेपाल र नेपालीको साथमा उभिने प्रयासस्वरूप अमेरिकी सेनाको कार्गो जहाजमा स्वास्थ्य उपकरण र स्वास्थ्य सामग्री पठाउने भएको छ ।
हाल नेपालमा कोभिडको सङ्क्रमण र यसका बिरामीको सङ्ख्या निरन्तर बढिरहेको छ । यी स्वास्थ्य उपकरण तथा स्वास्थ्य सामग्री बोकेको जहाज भदौ १२ गते (अगस्ट २८ तारिख)मा काठमाडौँस्थित त्रिभुवन अन्तर्राष्ट्रिय विमानस्थलमा ओर्लनेछ । कार्गो विमान पुगेपछि अमेरिकी सहयोग नियोग (यूएसआईडी)को समन्वयमा स्वास्थ्य मन्त्रालय, स्वास्थ्य सेवा विभागलाई एक समारोहबीच हस्तान्तरण गरिने कार्यक्रम रहेको एनआरएन अमेरिकाका अध्यक्ष बुद्धिसागर सुवेदीले जानकारी दिनुभयो । यसका लागि आफू पनि नेपाल जान हवाई टिकट लिइसकेको जानकारी पनि उहाँले दिनुभयो ।
विशेषतः अस्पताल र जनस्वास्थ्यसँग प्रत्यक्ष सरोकार राख्ने स्वास्थ्य सामग्रीले भरिएको सो कार्र्गाे विमान अमेरिकी सेनाले निःशुल्क उपलब्ध गराएको हो । स्वास्थ्य सामग्रीचाहिँ एनआरएन, अमेरिका, एनआरएनका विभिन्न शाखा र सामाजिक अभियन्तामार्फत सङ्कलन गरिएको हो ।
उक्त कार्गो अक्सिजन कन्सन्ट्रेटर, सीपी मेसिन, मास्क सिल्ड, मास्क, गाउन र पीपीईलगायतका सामानले भरिएको छ । यसरी कार्गो गरी पठाउन लागिएको सामानको मूल्य करिब ४७ लाख (चार लाख अमेरिकी डलर) रुपियाँ बराबर छ । अध्यक्ष सुवेदीले भन्नुभयो, “यो महाव्याधिको समयमा अमेरिकामा रहेका एनआरएनले विभिन्न समयमा नेपाल र नेपालीसँग जोडिएर सहयोग गरेको र यस पटक पनि यो सहयोग गर्न पाउँदा एकदमै खुसी लागेको छ ।”
सुवेदीका अनुसार अमेरिकी सेनासँगको यो समन्वयले एनआरएन अमेरिकालाई अमेरिकी सरकारले मान्यता दिएको र सम्बन्ध स्थापना भएको यो एउटा ज्वलन्त उदाहरण हो । यी स्वास्थ्य सामग्री नेपाल पुगेको अर्को हप्ता पुनः करिब १० लाख थान मास्क लिएर अर्को कार्गो पनि नेपाल जाने तयारी भइरहेको बुझिएको छ ।
प्रतिक्रिया लेख्नुहोस्:-