सौर्य आँधीका कारण महिनौंसम्म इन्टरनेट बन्द हुन सक्ने

काठमाडौं । लामो समयदेखि अनुसन्धानकर्ताहरूले ठूलो सौर्य आँधी आए पृथ्वीमा रहेका विद्युतीय प्रविधिमा असर पर्न सक्ने बताउँदै आएका छन् । यसैबीच सौर्य आँधीकै विषयमा नयाँ अध्ययन सार्वजनिक भएको छ । जसले कतिपय महादीपमा एक दिन अथवा महिनौंसम्म इन्टरनेट बन्द हुने बताएको छ । सय वर्षमा एकपटक आउने सौर्य आँधीले महिनौंसम्म इन्टरनेट सेवा अवरूद्द हुनसक्ने एक अध्ययनले निष्कर्ष निकालेको छ । गत महिनामा सिगकम २०२१ कन्फ्रेन्स आयोजना भएको थियो । उक्त कन्फ्रेन्समा युनिभर्सिटी अफ क्यालिफोर्नियाकी प्रोफेसर संगीता अब्दु ज्योतिले उक्त अध्ययन प्रतिवेदन प्रस्तुत गरेकी थिइन् ।

उनले हाल समुन्द्र सतह मुनी बिछ्याइएका केबलको अवस्था नाजुक रहेकाले सौर्य आँधीको असर त्यसमा पर्ने बताएकी छन् । जसको प्रभाव धेरै महादीपमा पर्ने जनाइएको छ । किनभने त्यही समुन्द्र सतहमुनी बिछ्याइएका केबलमार्फत धेरै महादीप इन्टरनेटसँग जोडिएका छन् । ‘कोभिड-१९ को महामारीका लागि विश्व कति पनि तयार थिएन भन्ने देखिएको छ,’ उनले भनिन्, ‘त्यस्तै ठूलो सौर्य आँधीका लागि पनि हामी तयार छैनौं । हाम्रो पूर्वाधार पनि त्यो अनुसार तयार छैन ।’ अध्ययनका अनुसार समुन्द्र सतहमुनी बिछ्याइएका झन्डै ५० देखि एक सय ५० किलोमिटर फाइबर अप्टिक केबलमा सौर्य आँधीले असर पार्नेछ । जसले ठूलो मात्रामा इन्टरनेट प्रयोगकर्ता प्रभावित हुने जनाइएको छ ।