काठमाडौं। फ्रान्सले अमेरिका र अस्ट्रेलियाबाट आफ्ना राजदूतलाई फिर्ता बोलाएको छ । उसले विचार विशर्मको लागि आफ्ना राजदूत फिर्ता बोलाएको बताएको छ । फ्रान्सको यो कदमलाई अकुस सुरक्षा सम्झौताको विरोधको रुपमा हेरिएको छ । चीनलाई काउन्टर दिनको लागि गरिएको भनिएको यो सम्झौतामा अमेरिका, बेलायत र अस्ट्रेलिया सहभागी छन् ।
प्रान्सका विदेशमन्त्रीले स्थितिको ‘असाधारण गम्भीरताका’ कारण यो ‘असाधारण फैसला’ उचित भएको बताएको बीबीसीले जनाएको छ । हालै तीन देशले गरेको अकुस सम्झौता अन्तर्गत अमेरिका र बेलायतले अस्ट्रेलियालाईै परमाणु पनडुब्बी बनाउने प्रविधि दिने सम्झौता भएको छ । तर, पहिले अस्ट्रेलियाले पनडुब्बीसम्बन्धी सम्झौता फ्रान्ससँग गरेको थियो ।
अहिलेको सम्झौतापछि अस्ट्रेलियाले फ्रान्ससँग पनडुब्बी किन्नको लागि पहिले गरेको ५६ बिलियन युरो बराबरको सम्झौता रद्द गरेको छ । यही कारण फ्रान्स यो सम्झौताप्रति आक्रोशित छ । आफूसँगको सम्झौता रद्द गरेर अकुस सम्झौता गर्न अमेरिकाले अस्ट्रेलियालाई दबाब दिएको फ्रान्सको बुझाइ छ ।
अकुस सम्झौतालाई दक्षिण चीन सागरमा चीनको बढ्दो दबदबालाईै रोक्ने दिशामा चालिएको कदम भनिएको छ । बुधबार अमेरिकी राष्ट्रपति जो बाइडेन, बेलायती प्रधानमन्त्री बोरिस जोनसन र अस्ट्रेलियाली प्रधानमन्त्री स्कट मोरिसनले यो सम्झौताको घोषणा गरेका थिए । फ्रान्सलाई यो सम्झौताबारे जानकारी सम्झौताको घोषणा गरिनुभन्दा केही घण्टा अघि मात्र दिइएको थियो ।
फ्रान्सका विदेशमन्त्री जीन इवरे द्रियानले शुक्रबार राती एक वक्तव्य जारी गरेका छन् जसमा राष्ट्रपति इम्मानुएल म्याक्रोनको निर्देशनमा राजदूतलाई फिर्ता बोलाइएको भनिएको छ । फ्रेन्च विदेशश मन्त्री द्रियानका अनुसार यो सम्झौताले ‘सहयोगी र साझेदारहरुको बीचमा एक अस्वीकार्य व्यवहार सृजना गर्छ जसले प्रत्यक्ष रुपमा हाम्रा गठबन्धनहरु, हाम्रा साझेदारहरुको दृष्टि र युरोपमा इण्डो प्यासिफिक क्षेत्रको महत्वलाई प्रभावित गर्छ ।’
प्रतिक्रिया लेख्नुहोस्:-